Преку конструктивен дијалог, секогаш можеме да дојдеме до решенија кои ќе ги пресретнат очекувањата на двете страни, а истите се во интерес на заштита на работните места и заштита и на оние кои ги изгубиле работните места, напиша министерката за финансии Нина Ангеловска по усвојувањето на измените на двете уредби со кои се нуди можност работниците кои ги загубиле работните места во текот на кризата да можат да бидат вратени на работа и се допрецизираат условите во кои не смее да се отпуштаат работници ако се користи мерката за субвенционирање на плати.
– На владината седница, денес на 1 Мај, усвоивме две уредби со законска сила – можност работниците кои ги загубиле работните места во текот на кризата да бидат вратени на работното место до 7 мај и со тоа да добијат плата за месец април и допрецизирање на уредбата за финансиска поддршка од 14.500 денари со цел засилување на владината политика за спас на работни места, а во согласност со синдикатите, вели Ангеловска во објавата на Фејсбук.
Со промените, усогласени со синдикатите и граѓанските здруженија за заштита на работничките права, се утврдува дека работодавачот кој ќе користи финансиска поддршка за исплата на плати, не смее да го намали бројот на вработени во месец април 2020 година, како и два месеци после нејзиното престанување (заклучно со месец јули 2020 година)
Ангеловска појаснува дека работодавачите кои одјавиле работник од задолжително социјално осигурување во периодот од 11 март до 30 април може да склучат спогодба за враќање на работа со што работникот ќе се врати на работното место и ќе земе плата за месец април, а доколку работникот не сака да се врати на работа, тогаш работодавачот може на негово место да пријави друго, невработено лице.
Ј. Ѓ.
