Претседателот на државата, Стево Пендаровски, упати честитка по повод Денот на отпорoт на Ромите против нацистите во Втората светска војна и порача дека денес, во современото демократско општество, нема простор за кршење на човековите права, антициганизмот и дискриминацијата.
Одбележувајќи 75 години од победата над фашизмот, се потсетуваме и на 16 Мај, денот на храбриот отпор на Ромите во концентрациониот логор Аушвиц-Биркенау против нацистите за време на Втората светска војна, во 1944 година.
Ромските затвореници, жени и мажи, вооружени со чекани, лопати и други дрвени предмети се спротивставиле на нацистите, избегнувајќи сигурна смрт за Ромите и Синтите тој ден.
16 Мај ја означува борбата за право на живот, нескротливата желба за опстанок, но и последиците од еден ужасен период од историјата. Денес, живеејќи во современото демократско општество, хуманоста и меѓусебната почит нè потсетува дека нема простор за кршење на човековите права, антициганизмот и дискриминацијата, напиша претседателот Пендаровски по повод Денот на отпорот на Ромите во концентрациониот логор Аушвиц-Биркенау во Втората светска војна.
