Министерката за одбрана, Радмила Шекеринска во посета на армискиот полигон Криволак, каде интензивно се вршат реконструкции и се создаваат поволни услови за негова употреба во полн капацитет со пробивање нови патишта до полигонот.
Министерката за одбрана Радмила Шекеринска и началникот на генералштабот, генерал потполковник Васко Ѓурчиновски, заедно со шефот на канцеларијата за одбранбена соработка при амбасадата на САД, потполковник Ден Маједа, денеска извршија увид во градежните активности на полигонот Криволак каде инженерискиот баталјон на Армијата ја реконструира патната инфраструктура и пробива нови патишта.
Воениот полигон Криволак е одличен ресурс за нашата Армија, меѓутоа воениот полигон Криволак ќе стане одличен ресурс и за НАТО Алијансата. Со инвестициите што веќе ги правиме, со модернизацијата која што ја планираме и со свои сили и со поддршка на американската Армија убедена сум дека армискиот полигон Криволак ќе биде најдобриот полигон за вежби на НАТО на европскиот континент, истакна министерката Шекеринска и додаде дека овој полигон за вежби го дава одговорот што е тоа што нашата земја може да го понуди на НАТО алијансата.
Шекеринска рече дека инвестициите направени во Армијата изминатиов период, особено инвестициите во инженерискиот баталјон се видливи на дело.
Покажуваме колку се важни инженериските единици во рамките на Армијата кои практично врз база на сопствени сили успеваат да градат инфраструктура на Криволак. Со оваа инфраструктура ќе ја зголемиме мобилноста во рамки на полигонот, меѓутоа и ќе го зголемиме капацитетот за изведување на вежби кои што навистина ќе бидат во ранг кој другите земји немаат ниту пак можат да си го дозволат. Јас очекувам дека ова ќе биде ресурс за нашата Армија, ќе биде ресурс за НАТО, но ќе биде ресурс и за локален развој бидејќи со можноста за изведување на големи вежби овде ќе имаме и поголема потрошувачка и поголем интерес од страна на повеќе НАТО армии.
Министерката Шекеринска им честиташе на припадниците на инженерските единици кои со новата механизација бргу ги реализираат задачите. Колку модернизацијата ги зголемува капацитетите на армискиот полигон Криволак ќе може да се види следната година кога во нашата земја ќе се реализира еден дел од најголемата вежба во Европа „Дефендер“ со учество на сојузнички армии, рече Шекеринска.
Мислам дека ова покажува кои се капацитетите на нашата Армија и дека не е случајно тоа што е таа веќе НАТО Армија, изјави министерката.
Командантот на инженерискиот баталјон потполковник Томе Пеев рече дека инженерискиот баталјон веќе 30 дена работи на изработување на нова и реконструкција на постоечката инфраструктура на АП Криволак со цел да се обезбеди систем обиколница околу периметарот на границата на АП Криволак и внатрешно поврзување со вкупна должина од 75 км.
