Директорката на Клиниката за инфективни болести и фебрилни состојби, д-р Милена Стевановиќ, за СДК.мк вели дека за случајот со починатата пациентка на 24-годишна возраст ќе биде консултиран и тимот на Македонската академија на науките и уметностите (МАНУ) со кого Клиниката соработува на истражувањата во врска со коронавирусот.
Откако ѝ бил дијагностициран ковид-19, младата тетовка се лекувала дома со прописна терапија препишана од матичен лекар, подоцна ѝ се влошила состојбата па била хоспитализирана во болницата во Тетово, а потоа на Клиниката за инфективни болести во Скопје.
„Имавме благо подобрување во лекувањето, но брзо потоа попушти срцето и се појави пулмонална тромбоемболија. Ја лекуваше и кардиологот кој е кај нас, ѝ даде соодветна терапија, но таа не успеа да се избори. Зошто оваа млада жена разви така тешка слика немам одговор, ни човечки ни лекарски. Немаше покачена телесна тежина“, вели д-р Стевановиќ за СДК.мк.
Починатата девојка немала ниту други претходни хронични заболувања. Таа е најмладиот пациент кој почина од коронавирусот во земјава од почетокот на епидемијата.
