После објавувањето дека досегашниот градоначалник на Штип, Благој Бочварски, ќе го води Министерството за транспорт и врски, Бочварски на прес конференција во Штип, се заблагодари на довербата што ја доби од претседателот на СДСМ и иден премиер Зоран Заев.
Бочварски истакна дека покрај честа, водењето на министерството претставува и огромна одговорност која е спремен да ја преземе..
– Благодарам за огромната одговорност која ми ја додели Претседателот на СДСМ Зоран Заев, потврдена вчера на органите и телата на партијата. Ова е за мене нов предизвик на кој ќе одговорам со сериозна, упорна, чесна и посветена работа за унапредување и осовременување на инфраструктурата на територијата на цела земја, рече Бочватски.
Тој потенцира дека добиваме нов состав со чесни, исполнителни, посветени кадри кои ќе продолжат да ја водат земјата напред и во нови успеси.
Бочварски додаде дека со истиот жар ќе продолжи да се бори за она што е приоритетно, за она што ни е важно и денес, но и за следните генерации.
– Како Министер за транспорт и врски ќе ја продолжам реализацијата на изградбата на брана на река Отиња која е во програмите на министерството за транспорт и врски и на Владата, што ќе биде белег на Штип и гордост на сите штипјани. Повторно и повторно се обврзувам пред сите вас дека ќе продолжам да работам на значаен инфраструктурен развој, не само на Штип и на регионот, туку овој пат на целата земја. Беспоштедно ќе се посветам на труд и многу работа во изградбата на модерна и европска инфраструктура, која е главен предуслов за растечка економија и висок квалитет на живот, рече Бочварски.
Бочварски нагласи дека ќе се посвети на изградба на автопатишта, експресни патишта и локални патишта на територија на целата земја и додадее дека ќе им помогне на општините за реализација на што е можно повеќе проекти, а со тоа и развој на локалните заедници.
– Како архитект и градоначалник имам стекнато искуство кое е значајно токму во оваа насока во делот на развојот на урбанизмот и инфраструктурата во државата, рече Благој Бочварски на денешната прес-конференција.
Ј. Ѓ.
