Пратеничката и потпретседателка на СДСМ, Јована Тренчевска, на прес-конференција упати жестоки критики по повод двегодишниот мандат на Владата предводена од Христијан Мицкоски. Според неа, наместо ветениот поголем животен стандард и повисоки плати, реалноста денес покажува дека граѓаните живеат потешко, поскапо и понеизвесно, додека социјално ранливите категории и пензионерите се комплетно изманипулирани и заборавени од државата. Единствено нешто што забрзано се зголемува изминативе две години, како што посочи Тренчевска, се цените, трошоците за живот и стапката на сиромаштија.
Опозицијата алармира дека македонскиот работник во моментов ја зема најниската плата во Европа, со која едвај успева да го преживее месецот. Како директен пример за неуспехот на економските политики, Тренчевска го посочи драстичниот скок на инфлацијата која наместо ветуваните 2,5 проценти, денес изнесува 4,8 проценти. Таа додаде дека на едно четиричлено семејство сега му се потребни скоро 70.000 денари за покривање на основните месечни трошоци, што значи дека за нормален живот се неопходни речиси три минимални плати кои воопшто не го следат растот на цените.
Скратени пари за пензионерите и нула реализација на платформата „1198“
Тренчевска упати и директно обвинување за манипулација со пензионерите, тврдејќи дека преку лажна кампања власта им ги скратила парите. Според нејзините математики, доколку се задржел претходниот систем на СДСМ, најмалото зголемување на пензиите ќе изнесувало меѓу 1.500 и 1.600 денари, а најголемото 3.500 денари, што во текот на годината ќе донесело многу повеќе пари во пензионерските буџети.
„ВМРО-ДПМНЕ ветуваше намалување на сиромаштијата, а уште во првата година донесе зголемување од 22 проценти. Нема исполнето ниту едно клучно ветување од нивната платформа ‘1198’ за помош на најранливите. Гарантираната минимална помош не е зголемена за 10 отсто на годишно ниво, ниту пак посебниот додаток за 30 проценти“, изјави Тренчевска.
Таа нотираше дека целосно потфрлиле и ветувањата за изградба на нови домови за стари лица, дневни центри за лица со попреченост, како и мерката за поврат на персонален данок за вработените мајки по породилно отсуство, заклучувајќи дека вкупниот резултат на Мицкоски по две години власт е нула.
