Со нови четири оздравени пациенти од Ковид-19, Берово полека се враќа на листата на градови каде бројот на активни случаи на коронавирус константно се намалува. Оваа добра вест се надоврзува на вчерашната позитивна вест за оздравувањето на директорот на беровскиот здравствен дом, кој го победи коронавирусот откако цели две недели беше приклучен на респиратор.
Поради ова здравствените надлежни се оптимисти дека ситуацијата и понатаму ќе се подобрува.
-Полека но сигурно спласнува лошиот биланс кој минатиот месец го имавме како резултат на семејните кластери и сите случаи кои меѓу себе беа поврзани меѓусебно. Иако имаме нови тестирања за сомнителни случаи, сепак најголем дел од нив се негативни што дава надеж дека состојбата уште повеќе ќе се подобрува, истакнаа надлежните.
Апелираат и покрај добрите вести граѓаните да го прават она што е добро за нивното здравје, а тоа е да носат заштитни маски и да одржуваат дистанца.
-Се покажа дека тоа е најдобрата одбрана против вирусот и затоа нека остане апелот до граѓаните за продолжување на оваа себе заштита против невидливиот непријател, додадоа надлежните.
