Народна банка вчера реагираше на гостувањето и обвинувањата на Трифун Костовски во „Студио 10“ на ТВ 24, целосно отфрлувајќи ги и укажувајќи на неисполнувањето на својата законска обврска за докaпитализација на Банката од сопствениците на „Еуростандард банка“.
„Уште еднаш нагласуваме дека согласно со своите законски надлежности, Народната банка ги има преземено сите соодветни мерки, вклучително и законската обврска за поднесување кривична пријава за предизвикување стечај и штета на доверителите на „Еуростандард банка“ АД Скопје, со предлог за преземање и други мерки за натамошна заштита на интересите на доверителите“, изјавија од Народна банка.
На оваа реакција, преку соопштение, Трифун Костовски вели дека со изјавата Народна банка потврдува дека сите алатки за стабилизирарање на Еуростандард банка не биле користени.
„Би сакал да расчистиме – Народна банка е регулатор, кој треба да ги регулира финансиските текови во државата. Народна банка не е инспектор кој врз основа на инспекција изрекува и казни. Во случајов, Народна банка не прави разлика во поимањето регулатор и инспектор. Невозможно е од 6,55% адекватност на капиталот кон крајот на март 2020 година да падне на 2% адекватност, во рок од 4,5 месеци, во кои 3 месеци и 1 недела имаше вонредна ситуација.
Веселата математика направена од страна на Народна банка не држи, падот од 6,55 % адекватност на капиталот на само 2 % адекватност е чиста математика, со носење на лошите пласмани во уште полоша категоризација. Зошто, ја прашувам Народна Банка, кога при тој слободен пад на адекватноста на капиталот, кој за 4,5 месеци од 6,55% падна на 2% не ги примени алатките: Вонредни мерки и Администрација.
Костовски побара од Народна банка веднаш оставка од целото раководство поради свесно носење на банката во стечај.
