пишува: РИБАРО
Вчера, во белата палата на вмровците неколку блиски луѓе на Мицкоски биле сведоци на непријатен телефонски разговор на Арбен Таравари со Христијан Мицкоски.
Имено, како што јавуваат изворите на АХА од белата палата, Таравари му се јавил на Мицкоски и го прашал зошто ВМРО-ДПМНЕ нема излезено со официјална честитка за Денот на албанската азбука.
Таравари: Ало, Христијане, фала ти за честитката за празникот, не си морал толку да се трудиш?
Мицкоски: Ааа… нема проблем, како така, па нели од сега наши ќе сме.
Таравари: Како ќе сме наши Христијане?! Арно ќе беше да го честитавте, ама еве отиде денот, ама од вас ни ал ни абер. Ми се јавуваат луѓе од партија и ми велат – А, бе Арбен, шо е работава со идниов коалиционен ни партнер, едно обично почитување на празник не сака да проследи, а ти ни го фалиш, као се извинил шо го испотепаа Зијадин, као се реформирале…
Мицкоски: А, не не сме заборавиле, тоа е планирано за после пладне намерно откако ќе се испукаат сите со честитки, како шлагворд, ме разбираш?
Останал Мицкоски ококоравен во очите, го тргнал телефонот за да не слуша Таравари и на секретарката и наредил – под итно спреми соопштение со честитка за Денот на албанската азбука.
Таравари: Каков шлагворд црни Христијане, 5 часот попладне е, гледаш ли другиве како тоа го направија, што сте вие, забавно-рекреативна иницијатива, или сериозна партија?
Мицкоски: Серизна партија, се разбира. Ама да не претеруваме сега. А и ти Арбен кога ми го спушти и ме накодоши дека јавно сум се извинил за 27 април. Како јавно кога нели ти текнува едвај промрморив од што ми беше срам да го гледам Села во очи. А и за Законот за употреба на јазиците што ми го потпикна и со тоа, а знаеш дека цела кампања наша беше на тоа дека Заев ја распродаде државата на Албанците, а ние не ја даваме…
Таравари: Христијан бе, ти апла загревотка си бил, се слушаш ли како кукумљакаш? Како вака со вас?! Пуштајте тоа честитката!
Му треснал слушалка Таравари на Мицкоски, а овој останал подзинат. Мицкоски и се пуштил со висок тон на недолжната секретарката – Не ме гледај, спремај соопштение со честитка. Види таму ако може да се смени времето на објава направете така да биде пред честитката на Заев.
Изворот на АХА, известуваат дека блиските луѓе што биле сведоци на ова, си ги поткасале усните, ја свиле опашката и полека ја напуштиле белата палата.
Рубриката АХА! е простор за хумор и сатира. Секоја сличност со реалноста е намерна и не е претерана.
FRONTLINE.MK
