Откако МВР и министерот Спасовски потврдија дека се приведени две лица, едно во Битола и едно во Велес, во врска со случајот Јавна соба, а се преземаат мерки и активности и кон други лица, администраторите на „Јавна соба“ отвориле нова група, пишува А1 он.
Во единствената порака што се споделувала на групата има известување дека е направена нова група, а администраторот повикува да му пишуваат во приватна порака за да им испрати линк.
Претходно од МВР информираа дека се превземаат мерки и активности и кон други лица во координација со Јавното обвинителство со цел расчистување на случајот и содветно санкционирање на сторителите.
Премиерот Заев објави дека се испратени барања до Телеграм за да се избрише групата Јавна соба.
„Испративме категорични барања до социјалната мрежа Телеграм да ја избрише групата „Јавна соба“ и нема да престанеме да инсистираме на тоа барање сѐ до негово конечно исполнување, наведе премиерот Зоран Заев на неговиот фејсбук-профил.
Тој нагласи дека доколку апликацијата Телеграм не го затвори каналот „Јавна соба“, каде се споделува порнографска и приватна содржина од наши граѓани, како и детска порнографија, ќе ја разгледаат и опцијата за блокирање или рестрикција на користењето на оваа апликација во земјава, сѐ додека не почнат да соработуваат со нас, со единствена цел да се затвори проблематичната група и да ни помогнат во откривање на идентитетот на оние кои споделуваат слики и прават кривично дело.
Премиерот изрази надеж дека нема да има потреба од рестрикции за Телеграм и дека уште денеска ќе одговорат на нивните бројни барања и ќе почнат да соработуваат.
– Сакам да упатам порака и до сите наши граѓани кои споделуваат слики и содржина на таа група во сопственост на други сограѓани, во истиов момент да престанете да го правите тоа и да излезете од таа група. На крајот на денот ќе ги добиеме податоците, ќе бидете обвинети и ќе одговарате за тоа што го правите, апелираше премиерот.
Заев упати охрабрувачка порака за жртвите на тоа насилство, нагласувајќи дека ги преземаат сите неопходни чекори да ги заштитат и да ги казниме сторителите на овие грозни дела.
– Упатувам поддршка и до сите што покажаа солидарност и осуда за ваквите појави. Така го правиме нашето општество посензибилизирано за овие појави кои мора секогаш да бидат обесхрабрени и осуетени во нивните намери. Заштитата на приватноста е дел од генетскиот запис на секој човек, и денес, кога се одбележува Денот на заштита на приватните податоци, уште еднаш се соочуваме со заканите од глобални размери и уште еднаш сме повикани сите ние силно да застанеме против оваа појава, порача Заев.
Правото на приватност е загарантирано со највисокиот правен акт – Уставот на Република Северна Македонија. Деновиве сме згрозени што повторно сме сведоци на случајот „Јавна соба“, случај во кој фрапантно се крши приватноста на илјадници жени и девојчиња, понижување, сексизам и насилство кои оставаат трајни последици на нивните животи, вели во изјава за МИА претседателот на државата Стево Пендаровски.
Претседателот Стево Пендаровски побара престапниците да бидат гонети, да се покаже солидарност и поддршка на жртвите и да не дозволиме двојна виктимизација
Шефот на државата потенцира дека насилството врз жените и девојчињата, во секоја форма – психичко, физичко, сексуално, е казниво со закон.
– Барам од надлежните институции соодветно да го истражат случајот, а престапниците да бидат гонети и казнети согласно законските прописи. Одговорност мора да има во најкус можен рок.
Доколку не се дејствува сега, се создава можност за креирање на култура на неказнивост за кривични дела со кои се уништуваат животите на илјадници жртви. Како општество, секој од нас треба да покаже солидарност и поддршка на жртвите, да не дозволиме двојна виктимизација. Да дејствуваме веднаш!, рече Пендаровки, коментирајќи го случајот со „Јавна соба“.
Ј. Ѓ.
