Бизнис заедницата од Катар има интерес за разгледување на можностите за инвестирање во земјава, беше речено на денешната средба на премиерот Зоран Заев со новиот амбасадор на Државата Катар, Јасим бин Хамид Ал-Тани.
Како што соопшти владината прес-служба, „ на состанокот се поздравени членството на Република Северна Македонија во НАТО и политиките на дијалог и пријателство на премиерот Заев што донесоа решение на долгогодишниот спор со Република Грција, за што е оценето дека е успешен пример во светски рамки“.
Оценето е и дека Република Северна Македонија е мирољубива и пријателски определена држава која бележи напредок и има потенцијали за натамошен развој.
-Ние сме насочени кон евроатлантските интеграции како стратешка определба на државата и истовремено работиме на создавање услови за подобар животен стандард и за економски развој на државата. Во таа насока ни е важна соработката со сите држави, посебно на економски план, рече премиерот Заев.
На средбата е констатирано дека се унапредува соработката со Катар во делот на енергетиката, како и дека постојат можности за продлабочување на соработката во областа на туризмот, транспорт, земјоделие, културата.
