Директорот на ЦУК, Стојанче Ангелов повторно реагираше за скандирањата на вчерашниот протест за случајот Монструм и вели дека тие не водат кон помирување, информира Фактор.мк.
„Скандирањето „УЧК“, „Етничка Албанија“, мавтањето со мапи на „Голема Албанија“ како и каменувањето на полицајците кои само си ја вршеа својата работа, за време на вчерашниот протест за Монструм, не одат во прилог на процесот на помирување за кој толку многу зборуваме и се залагаме, поради што треба да бидат цел на силна општествена осуда од сите значајни општествени фактори“, реагира Ангелов.
Додава дека иако правото на протест е неприкосновено, сепак иритира фактот дека вчера се протестираше против судски пресуди со кои за виновни се прогласени убијци и помагачи на убијци на 5 лица од кои 4 деца.
„И сето тоа без трошка сочувство кон семејствата на убиените деца. Затоа, апелирам! Не треба така, не е добро така. Штетно е за кревкиот процес на меѓуетничко помирување бидејки вистинското помирување е двонасочен процес во кој активно и внимателно треба да бидат вклучени двете страни“, наведува Ангелов.
Осум приведени и седум повредени полицајци е епилогот од протестот. Ова е втор протест за случајот Монструм годинава.
Владата најостро ги осудува нападите врз новинарите што случија за време на протестите после судските одлуки во случајот Монструм.
„Во демократски општества секој има право на изразување незадоволство, но насилничките инциденти се неприфатливи и недозволиви“, наведуваат од Владата.
Поаѓајќи од својот јасен став за нула толеранција за ваквите инциденти, Владата укажува дека секој напад врз медиумските претставници, физички или вербален, ќе биде најостро осуден и санкциониран и дека сите институции во државата, како и обвинителството и судовите, треба да постапуваат максимално брзо и професионално за било кој напад или закана против медиумските работници.