Земјите членки на еврозоната, познати како Еврогрупата, денеска се согласија дека мора да се зачуваат заштитните фискални механизми додека економиите во ЕУ и во еврозоната не излезат од кризата.
Ова е заклучокот на денешниот состанок на Еврогрупата.
Иако рецесијата не е толку длабока колку што очекуваше Европската Комисија минатата есен, ситуацијата е сепак лоша и неизвесна, и само ефикасен процес на вакцинација е решение за излез од кризата, смета Еврогрупата.
Од почетокот на оваа криза без преседан за економиите на ЕУ, Европската Комисија ги олесни буџетските и фискалните правила за земјите членки и воведе низа програми за помош.
Еврогрупата денес ги поздрави овие иницијативи и нагласи дека е од критично значење земјите да продолжат да се координираат во поддршката на фискалните политики.
„Ќе продолжиме да ја штитиме нашата економија преку воведување на потребната стапка на фискална поддршка“, се наведува во заклучокот од денешниот состанок на земјите од еврозоната и се потврдува дека додека не дојде до економско заздравување и додека трае акутната здравствена криза, силни фискални мерки за заштита на граѓаните и на бизнисите треба да останат на сила.
Откако ќе се подобри состојбата, земјите сметаат дека мерките ќе треба постепено да се насочат кон потаргетирани решенија, како на пример заштита на односите помеѓу вработените и фирмите, избегнување на стечаи, создавање нови работни места и можности за невработените. Секоја земја треба да има специфични мерки кои одговараат на нејзината ситуација. Закрепнувањето, наведува Еврогрупата, нема да се одвива еднакво во сите земји и региони на Унијата.
Еврогрупата оцени денеска дека откако економското заздравување ќе биде потврдено и извесно, земјите членки на еврозоната треба да се справат со зголемената стапка на јавен долг преку воведување на среднорочни фискални стратегии и поддршка за зелената и дигитална транзиција на општествата и економиите.
„Земјите членки треба да се фокусираат на промоција на приватни инвестиции и зголемување на капацитетот за производство на еврозоната“, се наведува во заклучокот на Еврогрупата. /МИА/
