Број на новозаразени со коронавирусот и натаму е во пораст. Од 1.682 тестирања, вчера беа регистрирани 457 нови случаи или 27 отсто од тестираните. Претходно, процентот се движеше околу 24 отсто. Вчера беше регистриран и зголемен број починати во однос на претходните денови. Пријавени беа 30 починати, на возраст од 50 до 84 година. Во статистиката беа забележани и оздравени 700 пациенти.
Досега во земјата се направени вкупно 591.958 тестирања на Ковид-19. Вкупната бројка на ковид-дијагностицирани од почетокот на епидемијата изнесува 119.828, бројката на оздравени пациенти е 101.474, на починати е 3.503, а бројот на активни случаи изнесува 14.851.
Најмногу активни има во Скопје – 7604, потоа следи Прилеп – 940, Кавадарци – 616, Охрид – 559, Куманово – 547. Во другите градови има под 500 активни случаи.
Вкупниот број на пациенти позитивни и суспектни на Ковид-19, кои се лекуваат на инфективните оддели во главниот град и во болниците низ земјава е 1.315 и има околу 340 празни болнички кревети во ковид-центрите.
Во Куманово хоспитализирани се 100 пациенти, во Прилеп 118, во ковид-центарот во Охрид има 92 пациенти, во Прилеп 118, Кавадарци 69. Во другите градови тој број е помал.
Во ковид-центрите во Скопје се хоспитализирани се вкупно 549 лица сомнителни и потврдени за Ковид-19. Во ГОБ „8 Септември“ има вкупно 123 болни, а на Клиниката за инфективни болести лежат 137 пациенти. Во Скопје има 90 слободни места.
Во Општата болница во Гевгелија се исполнети до последно место расположливите капацитети за болничко лекување на пациенти заболени од Ковид-19, изјави вчера директорот на болницата, Митко Крџев кој нагласи дека поради неповолната епидемиолошка состојба веќе се размислува каде и на кое одделение би можело да се создадат услови за дополнително сместување.
Владата на вчерашната седница, по препорака на Комисијата за заразни болести, донесе одлука да биде продолжена актуелната мерка за забрана и посебен режим на движење на граѓаните на целата територија на државата во временскиот период од 22:00 часот до 05:00 часот, почнувајќи од денеска, односно од 23 март до 6 април. Одлуката на Владата за воведување полициски час од 22 часот вечерта до 5 часот наутро, беше донесена на 10 март, а истекуваше вчера.
Во насока на справување со Ковид пандемијата, вчера амбасадорот на Јапонија, Савада Хиронори потпиша десет договори за грант помош во рамки на програмата за мали проекти за човекова безбедност (GGP) со цел подобрување на основните човекови потреби во Северна Македонија. Десетте проекти, како што соопштија од Амбасадата, имаат за цел да ја поддржат државава во справување со кризата Ковид-19, а секоја здравствена институција ќе добие различно финансирање согласно потребите.
Вкупната помош доделена во рамки на програмата за мали проекти за човекова безбедност (GGP) годинава достигнува над 540.000 евра, што е најголема сума што ја добила државава од почетокот на имплементирањето на програмата во 1996 година, информираат од Амбасадата.
Повеќе од 124 милиони случаи на коронавирус се пријавени низ светот од почетокот на пандемијата, при што над 2,7 милиони од заразените починале, a оздравеле 100 милиони.
Германски лекари вчера предупредија на „трет, разурнувачки бран“. Специјализираните германски здруженија на лекари за итни случаи и интензивна нега предвидуваат дека на почетокот на мај бројот на пациенти во единиците за интензивна нега за Kовид-19 може да се зголеми на 5.000 луѓе.
Ако Германија не ги заостри итно мерките, смртните случаи од Ковид-19 во државата ќе бидат многу, велат германските медицински лица.
Вчера резултатите од големото американско клиничко испитување на вакцината „АстраЗенека“ покажа дека таа е безбедна и високо ефикасна.
Во истражувањето учествувале над 32.000 испитаници, претежно од САД, но некои од нив биле и од Чиле и од Перу.
Во Србија не е забележан случај на анафилактичен шок. Српскиот епидемиолог Предраг Кон изјави дека од околу 2.2 милиона вакцини против коронавирусот аплицирани во државата, досега не е забележан случај на анафилактичен шок.
Во Албанија вчера попладнето пристигнаа првите 10.000 дози од руската вакцина „Спутник В“, донација од Обединетите Арапски Емирати.
