Се соочуваме со бран кој е предизвикан од мутација на вирусот која е различна во однос на карактеристиките кои вирусот и бранот го имаше во ноември. Имаме голем број хоспитализирани пациенти, лекувањето трае подолго отколку минатата година и тоа создава дополнителен товар на сите болнички установи, на сите здравствени работници кои се целосно мобилизирани и учествуваат во лекување на овие пациенти, рече денеска на прес-конференција министерот за здравство Венко Филипче.
Иако овие сегашни мерки ги стабилизираа бројките, не дозволија експоненцијален раст, посочи, во делот на хоспитализацијата пикот се надевам дека нема да има измени, беше на 31 март, 1 април, 2 април, сега нешто се намалува сепак огромна е бројката на новодијагностицирани, на хоспитализирани и тоа иако се намалена динамика, се кумулира и создава огромен притисок во болнциите.
– Празниците кои доаѓаат дополнително може да ја комплицираат епидемиолошката ситуација и во таа смисла не сакаме да дозволиме во продолжение на целиот тој период се случи дополнително оптоварување на здравствениот систем, нешто што веројатно тогаш тешко би можеле да го изменаџираме. Во таа смисла се сите овие дополнителни рестриктивни мерки со цел епидемиолошката слика дополнително да стивне, истакна Филипче на прес-конференцијата.
Посочи дека со тежок бран се соочуваат Србија, Црна Гора, Бугарија и многу земји од Средна Европа.
– Ги ангажиравме сите дополнителни капацитети во делот на болниците и активирани се модуларните ковид одделенија и сега почнува со работа ковид одделението во Битола. Иако има намалување на инциденцата во голем дел од градовите, има градови каде таа е се уште висока како што е во Куманово, Битола, Кичево и Тетово. Сите дополнителни одделенија се скоро исполнети. Во функција е болницата во Козле, која е снабдена со кислород, обезбеден е кадар и се хоспитализираат пациенти, рече Филипче.
Појасни дека има клиничка слика на болеста која е различна од претходниот бран, хоспитализацијата трае подолго, за разлика од претходниот бран кога на 14 ден од лекувањето пациентот во најголем број случаи се сметаше дека е излекуван, сега и кај помлади пациенти имаме влошување на состојбата на 12, 13 и 14 ден од лекувањето на начин на една форма која ретко се гледа со драстично влошување на сликата на белите дробови и крвта која за жал често завршува со лош исход покрај сите третмани на лекување и терапевтски пристап.
Во врска со смртноста, рече дека таа е висока насекаде во регионот.
– На пример на милион жители во Црна Гора има 2.078 смртни случаи, Босна – 2.071, во Бугарија – 1.967, Словенија – 1.963, а кај нас 1.891 смртни на милион жители. Има за жал и рекордни бројки на смртни случаи и во изминатите денови во Грција, Бугарија…Сите земји имаат голем број новодијагностицирани и хсопитализирани. За разлика од минатогодишниот просек од седум на вкуниот број дијагностицирани сега се хоспитализирани 11,12 проценти кај нас и согласно тоа и зголемен број смртни случаи, истакна Филипче.
Во врска со вакцинацијата посочи дека таа добро се спроведува и денеска во функција е и салата „Борис Трајковски“.
– Околу 300 граѓани на час во изминатите три четири часа се веќе вакцинирани. Двајца граѓани имале лесна клиничка слика компликација во смисла на колапс кој не е доведен во врска со вакцината. За кратко време после интервенцијата на службата за Итна медицинска помош се целосно повратени и се во добра здравствена состојба. Околу 3.000 граѓани дневно ќе се вакцинираат во салата „Борис Трајковски“. А вкупниот број во текот на следниот период и согласно доаѓањето на вакцините ќе го зголемуваме односно ќе се скратуваат времињата на чекање меѓу секој од вакцинираните. Вкупната бројка вакцинирани досега е 10 000, рече Филипче.
Во врска со девојката која имаше компликација, тромбоза на едната вена на окото, потенцира дека таа се чувствува добро и денеска ќе биде пуштена на домашно лекување.
– Очекуваме овој месец да стигне значајна количини вакцини од сите производители и согласно националениот план да бидат распределени по возрасни групи и за вработени кои имаат голем ризик да заболат и согласно тоа вакцинацијата да продолжи и во здравствените домови и во салата „Борис Трајковски“. Апелирам граѓаните да ги почитуваат новите мерки. Одговорноста е исклучително битна и само така ќе имаме ситауција бројките значајно да се намалат во следниот период и за што пократко време излеземе од овој трет бран, додаде Филипче.
извор: МИА
