Новиот Закон за учебници е нешто што јавноста го бара подолго време, бидејќи досега имавме неквалитетни учебници, полни со дискриминирачки и неточни содржини. Сега се дава можност за избор помеѓу три учебника, односно се прави демонополизација на печатењето на учебниците. Истовремено се воведуваат инклузивни учебници, односно аудио учебници и учебници испечатени на Брајовото писмо, изјави министерката за образование и наука Мила Царовска во гостувањето на Клан ТВ.
Одговарајќи на новинарско прашање за барањата на Фејсбук групата „Учебници и настава мора да има“, министерката посочи дека учебници и понатаму ќе има, исто како и настава.
Царовска истакна дека на одржаната средба со претставници на МОН, со присутните од Иницијативата воопшто не станало збор за дигитализацијата на учебниците, односно претставниците на групата зборувале за етика на религиите како предмет и укинување на родово сензитивните наставни програми, што е спротивно на Меѓународните конвенции кои државата ги има потпишано.
“Реформата на основното образование во земјата има единствена цел, учениците да научат да поврзуваат содржини од различни наставни програми, да истражуваат и носат конкретни заклучоци, а не само да го реплицираат наученото од учебниците.
Учениците од прво до трето одделение и понатаму ќе имаат печатени учебници, бидејќи во тој период се учи односот кон книгата и пишувањето”, рече Царовска.
Министерката истакна дека за учениците од четврто одделение и погорните класови, прва опција ќе бидат дигиталните учебници, поставени на дигитални алатки, но многу е важно дека дигитализацијата на материјалите за учење ќе се воведува етапно.
“Започнува со четврто одделение во учебната 2021/2022 година, а секоја наредна ќе се опфаќа ново повисоко одделение и ќе се заокружи во следните 5 до 6 години, со единствена цел, овие ученици за 10 до 15 години да имаат стекнато дигитални вештини и знаења, за да можат да се најдат на пазарот на труд”, рече Царовска.