Со проекција на документарниот филм ФОРТЕ (Forte) од програмата на фестивалот „Вечери на женски права“ на режисерот Дејвид Донели (David Donnelly), на 14 мај (петок), со почеток во 20:30 часот, започнува со работа летното кино под отворено небо „Мирно лето“ – во дворот на Кинотеката, информираат од Кинотека на Северна Македонија.
Во рамките на фестивалот „Вечери на женски права“ ќе бидат прикажани и документарните филмови: ДЕНОТ НА ЖЕНАТА (Women’s Day) на Долја Гавански (Dolya Gavanski) и ТОА Е ТИНЕЈЏЕРСКИ СВЕТ – ВМРЕЖЕНИ ЗА СЕКС, ЛАГИ И ИГРИ НА МОЌ (It’s a Teen’s World – Wired for Sex, Lies and Power Trips) на Лин Глазиер (Lynn Glazier).
Програмата на летното кино продолжува со традиционалната Недела на италијански филм. Годинава, во фокусот на италијанските филмови ќе биде темата на емиграцијата, при што ќе бидат прикажани седум филмски наслови: ЛЕБ И ЧОКОЛАДО (Pane e cioccolata, 1974) на Франко Брусати (Franco Brusati); НОВИОТ СВЕТ (Nuovo mondo, 2006) на Емануеле Криалезе (Emanuele Crialese); ДА ВИ СЕ ПРЕТСТАВАМ? РОКО ПАПАЛЕО (Permette? Rocco Papaleo, 1971) на Еторе Скола (Ettore Scola), ДОБРЕДОЈДОВТЕ НА ЈУГ (Benvenuti al sud, 2010) на Лука Миниеро (Luca Miniero); САКО И ВАНЦЕТИ (Sacco e Vanzetti, 1971) на Џулијано Монталдо (Giuliano Montaldo); УБАВ, ЧЕСЕН ЕМИГРАНТ ВО АВСТРАЛИЈА БИ СЕ ОЖЕНИЛ СО ЧЕСНА СОГРАЃАНКА (Bello, onesto, emigrato in Australia sposerebbe compaesana illibata, 1971) на Луиџи Ѕампа (Luigi Zampa) и ТРОБОЈКАТА ОДИ НА ГЛАСАЊЕ (Bianco, rosso e Verdone, 1981) на Карло Верзоне (Carlo Versone).
На репортоарот на летното кино „Мирно лето“, потоа следуваат две вечери со проекции на филмови во рамките на летното издание на Скопје филм фестивал, а на 26 мај (среда) ќе се одржи и церемонијата на доделување на годишната награда на Кинотеката „Златен објектив“.
Кон крајот на мај, започнува и 11. издание на Филозофскиот филмски фестивал, кој ќе продолжи во Кинотека и во текот на јуни. Наредниот месец ќе биде исполнет со филмски наслови од Неделата на јапонскиот филм, Неделата на новиот германски филм, проекции на дигитално реставрираните македонски играни филмови МИРНО ЛЕТО и ФРОСИНА, како и редица други пријатни изненадувања, велат од Кинотека на РСМ.
Тие појаснуваат дека проекциите ќе се одвиваат со целосно почитување на препораките за заштита од ковид-19. Билетарата за посетителите ќе биде отворена од 19 часот, а проекциите ќе започнуваат во 20 часот.
извор: МЕТА
