Дозволете од мое лично име и од име на пратениците на Собранието на Република Северна Македонија да го честитам големиот муслимански празник – Рамазан Бајрам, кој доаѓа како круна на светиот месец Рамазан.
По тој повод, имам особена чест да упатам искрени честитки за добро здравје, семејни радости, спокој и душевен мир, лични победи и колективни успеси. Овој празник кој е посветен на милоста, љубовта и меѓусебното опростување, нека донесе полни срца и ум со убави и позитивни мисли и нека биде тоа поттик за правење на добри дела кои уште повеќе ќе ни ги облагородат душата и телото. За празниците се споделува со блиските, со далечните, со познатите и непознатите, меѓутоа, овие години на пандемија наметнаа поинакви правила и го смалија кругот на луѓето со кои сме опкружени, сепак, тоа не не спречува да споделуваме убави зборови, да пружиме рака на поддршка и да бидеме од помош таму каде што има потреба.
Понекогаш, дури и мала, но топла насмевка е сѐ што е потребно за да заживее вербата дека сите сме еднакви и имаме потреба од еднакви нешта. Пандемијата, иако не оддалечи физички, сепак го сплоти човештвото во справување со предизвиците што ги донесе со себе. Заедно, да растеме индивидуално и колективно врз темелот на взаемна почит, соработка кон постигнување на заедничките цели, кон нашата подобра иднина.
Нека е честит големиот празник – Рамазан Бајрам, Ви посакувам убави празнични денови исполнети со среќа, радости и благосостојба.
