Министерката за труд и социјална политика, Јагода Шахпаска и градоначалникот на Општина Струмица, Коста Јаневски, денеска остварија работна средба, на која разговараа за тековните и идни проекти кои се од интерес на граѓаните на оваа општина.
„Соработката на централната со локалната власт е од особено значење, затоа што придобивките од неа директно ги чувствуваат сите граѓани во нашата држава. Министерството за труд и социјална политика и Општина Струмица имаат одлична соработка , за што потврдуваат проектите на кои заедно вложуваат“, рече министерката Шахпаска .
Во Oпштина Струмица во тек на изградба се две нови детски градинки, од кои едната е целосно нов објект со капацитет од 307 деца, а другиот објект е доградба на постојната градинка со што опфатот на деца се проширува со дополнителни 53 места.
Градоначалникот Јаневски информираше дека изградбата на двете детски градинки во Општина Струмица се одвива согласно предвиденото темпо и согласно планот ќе бидат подготвени за прием на деца во нив до крајот на годинава.
Вложувањето во правилниот детски развој е високо на агендата на Министерството за труд и социјална политика , потенцираше министерката , потврда за тоа е бројката од 11 отворени градинки за само осум месеци со опфат на 670 деца во нив. До крајот на годината предвидено е отворање на нови 13 градинки со опфат на нови 1400 деца во нив.
