,,По произвоство на мед и пчелни продукти кои ни се примарна дејност во пчеларството, голем предизвик ни беше да ја направиме апи комората и да им овозможиме на луѓето да можат да го користат воздухот од пчелните кошници за здравствени цели”- вели Бобан Стошевски, сопственик на пчелна фарма ,,Стошевски”.
Во село Драгоманце, општина Старо Нагоричане е отворена прва Апи инхалациона комора во североисточниот плански регион . Апитерапија со инхалација помага при лекување на луѓето кои имаат астма, бронхитис, белодробни заболувања, проблеми со дишните патишта, инфекции и алергии, главоболки и мигрена, а го подобрува и имуниот систем.
Бобан и Сашо Стошевски, сопственици на пчелната фарма Стошевски со пчеларство се занимаваат девет години ,а по истражувањата и искуството од апитерапијата се одлучиле да ја направат првата комора во кумановскиот регион.
– Идејата за ,,апи комора” дојде откако ја проучив целата литература и искуството кое го имаат русите и колку воздухот од пчелните комори е користен за луѓето, колку тој помага за лечење на многу здравствени проблеми,- вели Бобан Стошевски кој е и медицинско лице по професија.
– По произвоство на мед и пчелни продукти кои ни се примарна дејност во пчеларството, голем предизвик ни беше да ја направиме апи комората и да им овозможиме на луѓето да можат да го користат воздухот од пчелните кошници за здравствени цели- додава Стошевски.
Во Русија апитерапијата почнала да се развива во 90 тите години, а денеска се препорачува да се користи и во медицински цели. Подоцна тоа се проширило и во Словенија, Босна и Херцеговина и Србија, а сега и во Македонија, информира Стошевски.
Во апи комора постои два вида на инхалација, директна и индиректна. Директна инхалација се прави со помош на апарати-вентилатори кои го влечат воздухот од пчелната кошничка и преку маски директно се вдишува.
Индиректна инхалација се врши со директно вдишување на воздухот од пчелната кошничка која е отворена во апи комората но пчелките се затворени и не доаѓаат во директен контакт со луѓето.
Се инхалира два пати дневно. Првата инхалација се препорачана да трае до 15 минути, тоа е детоксикација на организмот додека луѓето да се навикнат и се прави пауза од 20 минути и повторно се прави инхалација која треба да трае до 20 минути. Се препорачува да се направат 10 третмани по 40 минути инхалација, а за потешките здравствени проблеми се препорачува и повеќе третмани. Со овој начин на инхалација се внесуваат сите пчелни продукти: мед, полен, прополис кој се смета за најдобро антибактериско средство во природата, восок и матичен млеч.
Апи инхалација може да се прави од април до август, кога пчелката е активна и работи.
Бобан Стошевски вели дека љубовта кон пчелите и здравите продукти кои ги дава пчелата се мотив да работат уште повеќе и да направат повеќе апи комори, а во иднина планираат да направат и апи комора во која ќе може и да се спие.
Се надевам дека и лекарите ќе започнат со препораки на пациентите да ги користат апи коморите за инхалација, вели Стошевски.
Промотивно, граѓаните ќе може да ја користат комората бесплатно, а за децата со здравствени проблеми третманите ќе бидат секогаш бесплатни.
Апи комората се наоѓа во село Драгоманце.
извор: Радио Бум
