Наставничката по англиски јазик и наставник-ментор Флутурије Џила Шеј од ООУ „Хасан Приштина“е една од 141 наставник кои беа унапредени во наставник-ментор на првиот јавен оглас на МОН. Со ова од септември наставничката Џила Шеј ќе добие зголемување на платата од околу 3.000 денари, но и дополнителни обврски и задолженија.
Менторот, освен што треба да го води наставникот – почетник низ училишни активности и да му помага во стекнувањата на потребни умеења и вештини за самостојна работа како наставник, ги менторира и студентите од факултетите за наставници, користи иновативни приоди и им помага на колегите во спроведување на акциски истражувања и учествува во изготвување на развојни политики на училиштето. Наставниците- ментори ќе бидат вклучени во спроведувањето на новата Концепција во основно образование, која стартува од септември годинава во прво и четврто одделение, а реформските процеси во деветолетката е предвидено целосно да се имплементираат во следните 5-6 годдини.
„Да бидеш наставник-ментор значи да си ценет и успешен во професијата. Тоа е плод на стандардите и критериумите кои си успеал ги постигнеш со текот на годините работа. Моето работно искуство ме натера да аплицирам за наставник-ментор затоа што е нормално секој којшто работел со ученици да бара да биде унапреден и да се усоврши во својата кариера”, вели наставничката Џила Шеј.
Наставничката рече дека е подготвена за предизвикот што ги очекува не само наставниците-ментори, туку и учениците и посакува во новата учебна година учениците да се вратат во училишните клупи.
„Јас како наставник- ментор, ќе се ангажирам за имплементација на новиот концепт во образованието, поддршка на моите колеги за поквалитетно образование во училница, како и за унапредување или потикнување на стручно усовршување и унапредувањето во нивната кариера. Нормално дека е многу значајно да се биде ментор-наставник, не е едноставна работа бидејќи бара максимална посветеност со колегите бидејќи преку нив ќе можеме да имаме подобра настава во училниците, поквалитетна настава и поквалитативна и долгорочна настава, потенцираше наставничката – ментор Флутурије Џила Шеј.
За да може еден наставник да стане ментор, треба да е минимум седум години во професијата, да е вработен на неопределено време, како и да ги исполнува професионалните стандарди за наставник-ментор. Кариерниот развој на наставниците е новина во нашиот образовен систем, што стартуваше годинава, по повеќе од една деценија најавување.
