Спортистките рекоа – доста. Тие повеќе не сакаат да бидат сексуализирани. Време е нивните тесни и многу предизвикувачки дресови да заминат во историјата.
Ова е порака која сè повеќе се слуша на разни спортски натпревари во женска конкуренција.
Прво, норвешката женска репрезентација во ракомет на песок се побуни против кодексот на облекување за нивниот спорт, кој ги обврзува да носат гаќички во бикини, а сега и германските гимнастичарки кренаа прашина.
Германките ќе одлучат дали сакаат на денешните квалификации на Олимписките игри во Токио, да носат дрес што го покрива целото тело, комбинација на трикота и хеланки, или само стандардното трико , откако добија пофалби за облеката за борба против сексуализацијата на нивниот спорт.
Германскиот тим носеше уникатна комбинација, што ги покриваше спортистките од врат до глужд, што наиде на огромна симпатија и одобрување од другите гимнастичарки од целиот свет.
– Сакавме да покажеме дека секоја жена треба сама да одлучи што ќе облече,
„Тоа не значи дека повеќе не сакаме да носиме вообичаени дресови. Тоа е одлука што се менува од ден на ден, врз основа на тоа како се чувствуваме и што сакаме. На денот на натпреварувањето, ќе одлучиме што да носиме“, рече 27-годишната Елизабет Сејц, која ќе се натпреварува, на за неа, третата Олипијада.
За жените, стандардниот дрес е трико, кој може да има долги ракави, оние до половина или да бидат без ракави. Облеката што ги покрива нозете е дозволена со уредбата за гимнастика на меѓународни натпревари, но до денес се користи исклучиво од религиозни причини.
„Тренерите исто така нè поддржуваат. Тие рекоа дека во секој случај сакаат да се чувствуваме најбезбедно и најудобно “, рече 21-годишната Сара Вос.
Ким Буи, којa исто така се натпреваруваше на Олимписките игри во Рио и Лондон, рече дека новиот моден избор на тимот е подеднакво удобен како и стандарднотo трико.
„И тренираме во хеланки, така што навикнавме да ја чувствуваме ткаенината на нашите нозе. И нема многу разлика помеѓу натпреварот и тренингот. Удобно е и тоа е најважното нешто”, рече 32-годишната Буи.
Во последниве години, спортот го потресуваат многу случаи на сексуално и физичко злоставување, што предизвика длабока интроспекција и воведување на нови безбедносни протоколи наменети за заштита на спортистите.
Пред неколку дена, споменатата норвешката женска ракометна репрезентација беше казнета откако девојките во мечот за 3-то место на Европското првенство во Варна одбија да носат бикини гаќички, бидејќи сметаат дека станува збор за сексуализација на ракометарките.
View this post on Instagram
Норвежанките се побунија и рекоа дека повеќе не сакаат да носат бикини гаќички на турнирите затоа што веруваат дека станува збор за сексуализација на ракометарките. Меѓународната ракометна федерација (ИХФ) го одби нивното барање, заканувајќи им се со казна. Сепак, Норвежанките не се повлекоа, туку настапија во кратки шорцеви кои не се во согласност со правилата на ИХФ за ракомет на плажа и заработија казна од 150 евра по ракометарка, или вкупно 1.500 евра.
Норвешката ракометна федерација соопшти дека ќе ја плати казната со давање поддршка на ракометарките.
извор: Jutarnji list
подготви: Ј. Ѓорѓиоски
