Шведскиот карикатурист Ларс Вилкс, кој го нацрта пророкот Мухамед со тело на куче, загина во сообраќајна несреќа, објави Би-Би-Си. Вилкс (75) живееше под полициска заштита откако добил бројни смртни закани поради карикатурата.
Според локалните медиуми, карикатуристот патувал со полициски автомобил без ознаки кој се судрил со камион во близина на градот Маркарид во јужна Шведска. Загинаа и двајца полицајци, а возачот на камионот е повреден.
Карикатурата, објавена во 2007 година, навреди многу муслимани, кои сметаа дека тоа е богохулие. Набргу потоа, Ал Каеда понуди награда од 100.000 долари за убиство на Вилкс.
Цртежот предизвика бес и го натера тогашниот премиер Фредрик Рајнфелд да се сретне со амбасадорите од 22 муслимански земји во обид да ги смири тензиите.
Во полициското соопштение се наведува дека се уште не е јасно како дошло до судирот, но првичниот увид не покажал умисла. /МИА/.
