„Јаловичната депонија која беше жешка еколошка точка и децениски проблем конечно ја решаваме. Донесовме нацрт-верзија на ДУП за да можеме да разговараме со потенцијални инвеститори и давам збор дека до крајот на 2023 година, не само што таа јаловична депонија ќе биде затворена и санирана, туку таму ќе никне една од најголемите фотоволтаични централи во земјава“ рече актуелниот и кандидат за градоначалник на Пробиштип од СДСМ и коалицијата, Драган Анастасов на трибината „Најдоборот за мојата општина“.
„Нема веќе да се крева оловна прашина и нема да се загадува почвата преку атмоферските води. Тоа е мојот прв врвен приоритет во новиот мандат“ кажа Анастасов.
Тој додаде дека донесен е и нов ДУП за Пониква каде што се планира развој преку отуѓување на земјиштето за викенд куќи и комерцијални објекти.
„Нема развој на Пониква, ако немаме пат од Пониква до Пробиштип. Тоа е мојот втор приоритет на кој ќе посветиме внимание. Знам дека е изводливо, бара жртва и труд, но мотивот на успехот ни се граѓаните на Пробиштиш“ рече Анастасов.
Тој најави и субвенционирање на реконструкција на зградите за домување во општината со изградба на енергетски-ефикасни фасади и кровови по принципот 70-30, односно 70 отсто инвестиција на општината, 30 отсто на станарите.
Сите проекти што ги ветив ги остварив, сега барам поддршка за нови 100 проекти
„Секој проект што го ветив во 2017 година, буквално се што беше приоритет ние реализиравме. Затоа драги мои барам поддршка за наредните четири години да служам, а не да владеам. Ако успеавме да ги решиме најгорливите проблеми во изминатите четири години, сега кога сме поискусни и позрели можеме уште повеќе“ рече актуелниот и кандидат за градоначалник на Пробиштип од СДСМ и коалицијата, Драган Анастасов на трибината „Најдоборот за мојата општина“.
Тој додаде дека не смее да се дозволи враќање на оние на кои најважни им биле бизнис интересите.
„Од нивните бизнис интереси, градскиот плоштад во Пробиштип не беше осветлен шест години. Ја барам поддршката од секој еден од вас за победа во прв круг во Пробиштиш. Уште еднаш ви потврдувам дека дупла 12-ка е добитна комбинација“ рече Анастасов.
Тој додаде дека доколку се зборува за модерен и поразвиен Пробиштип, потребен е нов градски плоштад и најави дека тоа е ставено како приоритет во неговата програма за новиот четиригодишен мандат.
„Сите проблеми и прашања се ставени на хартија и имаме план и решенија за нив“ кажа Анастасов и додаде дека сите јавни површини во општината, јавните институции нема да користат вода за пиење за наводнување, со цел таа да се зачува и да завршат проблемите со водоснабдувањето.
