„Првите чекори мораме да ги направиме во партијата. СДСМ постои за граѓаните и работи пред се за доброто на општеството и јавниот интерес. Промените почнуваат од секој поединец, а јасно дека е промени мора да правиме“, во објава на Фејсбук истакнува кадидатот за претседател на СДСМ, Димитар Ковачевски.
Тој нагласува дека партијата е отворена за сите, дека е човек кој не поддржува задкулисни партиски крила и струи и тоа не треба да ја одзема енергијата во работењето.
„Сите имаме иста цел, партијата да ги реализира ветувањата, да работи и го унапредува животот на граѓаните а за тоа мора да сме обединети и многу да работиме.
Го истакнувам ова затоа што партијата е организација чие добро функционирање зависи од придонесот на секој член. Само заеднички, организирано и со јасно поделени одговорности и задачи, СДСМ може да биде силна е исполнителна.
СДСМ мора да ги продолжи одличните социјални политики, покачувањето на минималната и просечната плата. Но, треба уште повеќе да зборуваме за решенија на проблемите за кои граѓаните зборуваат со семејствата, пријателите и кои им го отежнуваат секојдневнието. Партијата која владее треба да биде во постојан контакт со реалните проблеми и на истите да има одговори.
СДСМ треба да продолжи да се менува и реорганизира согласно најновите потреби, трендови и очекувања на членовите и граѓаните. Овие демократски капацитети потребно е да продолжат да се развиваат на сите нивоа во партијата, односно да се креира нов консултативен систем преку кој сите стратешки политики, програмски концепти, политики на локално ниво и останати мерки ќе бидат креирани во рамки на сите нивоа во партијата, со членството.
Процесот на целосно отфрлање на клиентелизмот дефинитивно е предизвик и цел на што СДСМ мора сериозно да работи заради напредок и трансформација на целокупното општество.
Функционирањето на месните одбори комплетно ќе се ревидира при што основите за функционалноста на партијата мора да започнуваат токму од овие локални, но суштински јадра на партијата. Членовите на највисоките раководства во рамки на општинските организации ќе бидат вклучени во рамки на дебатите за политики кои се одвиваат во рамки на партијата.
Реактивирање на централниот систем на комисии на СДСМ е неопходно и клучно бидејќи претставува сериозен механизам за стручно ангажирање и отварање на партијата кон многу професионалци од различни области и сегменти на општеството. Овој систем на комисии ќе претставуваат клучна алатка во креирање политики за секоја област посебно“, пишува Ковачевски.
