Поминаа 20 години откако бледите лица, темните исцртани очи и црната облека ги опседнуваа средните училишта и трговските центри низ светот. Додека некои тврдат дека никогаш не заминале, само се повлекле во сенка, консензусот за 2022 година е дека готскиот стил се враќа во мејнстрим културата со одмазда, пишува Гардијан.
Овој пат има некои разлики. Модерниот гот е поверојатно да се инспирира од ултра-глам „жешките готики“ како што се Кортни Кардашијан и Меган Фокс и милениците од модниот свет Рик Овенс и Јохџи Јамамото отколку самопрогласените аутсајдери кои го обожаваа Мерлин Менсон од раните 2000-ти. Тие, исто така, имаат поголема веројатност да интегрираат елементи на потемниот стил на облекување во нивниот секојдневен стил отколку да се претплатат на целата култура и начин на живот.
„Во еден момент се мислеше дека готот е „чуден и необичен“, но веќе не се чувствува така. Не би сакала да кажам дека е мејнстрим, но е многу повидливо“, рече Кетрин Спунер, професорка на Универзитетот Ланкастер, специјализирана за готска култура.
Ендрју Гроувс, професор по моден дизајн на Универзитетот во Вестминстер, го гледа новиот готски стил како реакција на усовршувањето, теретана-усовршено, Инстаграм-усовршено од 2010-тите.
„Стана непривлечно. Наместо тоа, размачканиот молив за очи и смртното бледило на лицето повторно станаа примамливи“.
Тој рече дека не е изненадувачки што луѓето бараат начини да ги изразат помрачните емоции естетски кога „сме преплавени со вести за смрт, смртност и болест“ од почетокот на пандемијата, додека затворањето на училиштата поттикна расположение на „романтична откаченост, мрзеливост и интроспекција“ кај тинејџерите.
Платформата за шопинг „Lyst“ соопшти дека пребарувањето за колекции на култниот готски дизајнер Рик Овенс, кои содржат црна кожа и панк детали како што се патенти, пораснале за 200% оваа година. Пребарувањата за црни предмети пораснале за 169%, додека чокерите пораснале за 81% а мрежестите маици за 196%.
Податоците на „Pinterest“, пак, укажуваат на готската естетика која влијае на секојдневниот живот. Пребарувањата за „готскиот бизнис лежерен“ стил, опишан како „Венсдеј Адамс во канцеларија“, се зголемија за 90% оваа година, со готска облека за бебиња зголемена за 120%, готскиот декор за 85%, а пребарувањето за готски пижами се зголемило за 185%.
Даниел Роџерс, моден и културен писател, вели дека новата готска естетика се приклучува на заживувањето на раните готици што ги дефинираше модата и културата на младите во последниве години. Роџерс го прикажува тековниот момент од феноменот „eboys“ и „egirls“ од доцните 2010-ти, каде што младите гејмери го популаризираа стилот што комбинира елементи на готик и емо со јапонски аниме и косплеј. Тој смета дека ова и сегашното повторување на готиката го одразуваат начинот на кој културата се развива на интернет.
„Ние сме во постојан циклус на гледање наназад и репродукција на нештата, исфрлајќи референци на масата, што е како бифе од кое младите можат да изберат“.
превод: Марија Миткоска
