Левичарскиот демократ Зохран Мамдани победи на изборите за градоначалник на Њујорк, според проекциите на американските медиуми објавени доцна синоќа.
Со преброени над 97 отсто од гласовите, 34-годишниот кандидат обезбеди недостижна предност, објавија неколку американски медиуми, повикувајќи се на податоци од Изборната комисија на Њујорк.
Неофицијалните резултати на веб-страницата на Комисијата покажуваат дека Мамдани освоил 50,4 отсто од гласовите, поранешниот демократски гувернер Ендрју Куомо 41,6 отсто, а републиканецот Куртис Слива 7,1 отсто, со помалку од 3 отсто од гласовите што остануваат да се пребројат.
Доколку резултатот биде потврден, Мамдани би станал првиот муслиман градоначалник на Њујорк – и еден од најистакнатите избрани противници на американскиот претседател Доналд Трамп.
Предизборна платформа и политичка тежина
Мамдани, член на Демократските социјалисти на Америка (Democratic Socialists of America), ја центрираше својата кампања на решавање на зголемените трошоци за живот во Њујорк. Тој вети контрола на кириите, како и бесплатен автобуски превоз и бесплатна грижа за децата, што планира да го финансира преку повисоки даноци за богатите и за корпорациите.
Покрај тоа што е културна и економска сила, Њујорк Сити има значителна политичка тежина, со население од околу осум милиони жители.
Пораз на Куомо
Според проекциите, Мамдани го победи Куомо за околу девет процентни поени. Куомо, кој настапи како независен кандидат по поразот на демократските примарни избори од 34-годишниот ривал, веќе го призна поразот.
Повеќе од два милиони жители на Њујорк гласаа – што е највисока излезност на избори за градоначалник од 1969 година, според изборните претставници.
Актуелниот градоначалник на Њујорк, Ерик Адамс, поранешен демократ кој е на функција од 2022 година, се повлече од кандидатурата за втор мандат по корупцискиот скандал и други проблеми.
Предизвик за Демократите
Победата на Мамдани ги предизвикува воспоставените структури на моќ во американската политика. 34-годишниот кандидат – кој заедно со семејството се пресели во метрополисот на источниот брег од Уганда на возраст од 7 години – претставува јасен прекин од традиционалната центристичка линија на Демократската партија и стана политичка мета за Трамп и републиканците, коментира германската агенција ДПА.
Неговата кампања во најголем дел се потпираше на мали донации – намерен сигнал против влијанието на големите донатори, кои Мамдани ги критикува во двете партии.
Тој доби силна поддршка од младите гласачи, синдикатите и заедниците со имигрантско потекло.
Набљудувачите очекуваат победата на Мамдани да поттикне внатрешна дебата меѓу демократите: помеѓу оние што сакаат да ја свртата партијата остро кон левицата за да се соочат со Трамп и оние што залагаат за попумерен курс.
Политичките сојузници на Мамдани, вклучително сенаторот Берни Сандерс и пратеничката Александрија Окасио-Кортез, велат дека исходот докажува дека левичарските политики можат да освоат мнозинска поддршка во Соединетите Американски Држави.
