Владата предводена од СДСМ продолжува со инвестирање во јавното здравство за мотивирани здравствени работници и задоволни граѓани. Здравствените работници ќе добиваат за пет отсто повисоки плати веќе од овој месец, велат од СДСМ во соопштение.
– Со СДСМ за овие четири години основната плата на лекарите специјалисти се зголеми за 40%, на медицинските сестри помеѓу 20% и 23%, на општите лекари за 25 отсто, на здравствените соработници за 15 отсто. Го корегиравме коефициентот за дежурства, а на младите специјализанти им овозможивме здравствено осигурување, платени дежурства и месечен надомест во висина на основната плата на општ лекар. Покрај инвестициите во човечкиот капитал, се инвестира и во опремување и реновирање на здравствените установи.
Охридскиот регион добива апарат за магнетна резонанца кој е поставен во Специјалната болница за ортопедија и трауматологија „Св. Еразмо“ во Охрид. Апарат за магнетна резонанца е поставен и во Струмица, како и во Институтот за радиологија во Скопје, а Општата болница во Кичево доби апарат за компјутерска томографија. Од Клиниката за ортопедија во Скопје целосно се реновирани 1.300 квадратни метри и опремен е Ургентниот центар во Специјалната болница за гинекологија и акушерство во Чаир, како и одделот за нефрологија на Клиника за детски болести. Владата предводена од СДСМ останува посветена на реализирање на проекти и мерки кои значат грижа за здравствените работници и подобрување на квалитетот на услугите за сите граѓани, се вели во соопштението.
