Министерката за одбрана Радмила Шекеринска, ѝ го предаде мандатот на новата министерка за одбрана Славјанка Петровска. На досегашната министерка за одбрана Шекеринска, и беше доделена плакета на Армијата, во името на припадниците на армијата како признание за вложениот труд и остварените резултати и придонесот на министерката Шекеринска во јакнењето на одбраната на Република Северна Македонија, плакетата ја врачи Генерал Васко Ѓурчиновски.
– Денес за мене е ден на измешани чувства. Чувство на гордост, исполнетост и задоволство од постигнатото. Заедно учествувавме во нешто што е поголемо од нас самите и испишавме историја која ќе е вредна за паметење. Знаевме дека ништо нема да биде лесно, но верувавме дека ништо не е недостижно. Ги преземавме обврските, и една по една успевавме да ги решаваме. Денеска успеавме да ја вратиме Република Северна Македонија во процесот на НАТО интеграциите, членка сме на НАТО еднаква и рамноправна со останатите. Воено интегрирана во рекордно брзо време, во седум-децениската историја на Алијансата, рече министерката Шекеринска.
„Во 2017-та реков дека припадниците на Армијата кои ја чуваат оваа земја, ќе го добијат достоинството и почитта која што им припаѓа со повисок стандард и подобри услови за работа. Се обврзав на континуирано зголемување на буџетот за одбраната, но и максимална транспарентност пред јавноста која мора да има увид во трошењето на парите. Денеска, сето она што пред 4 и пол години се чинеше невозможно, полека стана реалност. За сето тоа заслужни сте вие!
Вашата искреност, чесност и професионалност ме инспирираше да бидам и јас секој ден подобра. Вашата целосна посветеност кон граѓаните и државата, и во најтешките моменти кои за жал ги имаше многу, ми даваше сила да продолжам да се борам и за поголем буџет и за поголеми бенифиции, и за подобра опрема. Довербата која граѓаните ја имаат во вас за мене беше силен аргумент да продолжам да се борам.
Да работиме со интегритет, со силен мотив и без задршка. Оваа институција и претходно имаше силен корен, ви благодарам што заедно и дадовме крилја. Ја имав честа да и служам на нашата татковина во законодавната и во извршната власт. Горда сум што бев дел од историските успеси кои ги постигнавме заедно и здружени. Првиот совет кој го добив од службениците на НАТО е единствениот кој досега не го почитував, ми рекоа менаџирајте ги вашите и очекувањата на граѓаните. Но одсекогаш верував дека за една нација да се направи подобра мора да се надминат и сопствените очекувања, и тоа го правевме во изминатите четири години заедно, убедена сум и дека ќе продолжиме, истакна министерката Шекеринска, посакувајќи уште поголеми успеси“, истакна министерката Шекеринска.
Марија Миткоска
Видео: Мартина Ацковска