Северна Македонија и Франција имаат блиска и плодна соработка во одбраната, а на оваа соработка и претстојат и нови и интересни перспективи во иднина зашто и двете земји се исклучително посветени на тоа. Тоа го истакнаа министерката за одбрана Славјанка Петровска и амбасадорот на Франција, Сирил Бомгартнер, на средбата која се реализираше денеска во Министерството.
Министерката Петровска се осврна и на заедничката безбедносна и одбранбена политика на Унијата, при што истакна дека Северна Македонија дава свој придонес во оваа сфера. Имајќи предвид дека Франција е претседавач со Европската Унија првата половина од годинава, министерката Петровска ја реафирмираше потребата за брз почеток на преговорите за членство во Унијата.
„Северна Македонија направи исклучително голем прогрес и потребно е Унијата да го направи следниот чекор кој ќе биде силна мотивација за уште поголем развој. Земјава ги почитува и поддржува европските политики и нашето место е во Европската Унија. Последните неколку години направивме многу, реформите се видливи и затоа заслужуваме да го започнеме пристапниот процес“, рече министерката Петровска.
Амбасадорот Бомгартнер порача дека Франција целосно ја поддржува Северна Македонија на патот кон Унијата и порача дека пристапните преговори треба да почнат што е можно поскоро.
Соработката помеѓу двете земји и двете Армии може да се види и преку заедничките обуки и заедничкото учество во воени вежби. На претстојната најголема воена вежба досега организирана во нашата земја, „Swift Response 22“ учество ќе земат и француски војници. Северна Македонија и Франција активно соработуваат во доменот на јазичната обука и школувањето на припадници на Армијата на Република Северна Македонија на највисоките воени школи во Франција.
