Обраќањето на Украинскиот претседател Володомир Зеленски Ви го пренесуваме интегрално:
Второ утро од војната од големи размери. Во четири часот руските сили продолжија со ракетни напади на територијата на Украина.
Тие велат дека цивилните објекти не им се мета. Ова е лага. Всушност, тие не прават разлика во кои области да дејствуваат.
Како и вчера, под руски напад подеднакво се наоѓаат и војската и цивилите. Целта на овој напад е да се изврши притисок врз вас, граѓаните на Украина, да се изврши притисок врз целото наше општество. Нагласувам: не само врз владата, туку врз сите Украинци. И денес – дури и повеќе од вчера.
Нашите момци и девојки – сите бранители на Украина – не му дозволија на непријателот да го реализира оперативниот план за инвазија првиот ден. Украинците покажуваат вистинско херојство. Во повеќето правци непријателот беше запрен. Сеуште се водат битки.
Затоа, рускиот напад продолжува со пресметка на тоа дека нашите сили ќе бидат уморни. Но, никој не е уморен.
Силите за воздушна одбрана на Украина го штитат нашето небо. Колку што е можно повеќе. Непријателските авиони злобно дејствуваат над станбените региони, вклучувајќи го и главниот град.
Страшни експлозии на утринското небо над Киев, бомбардирање, напад врз станбена зграда, пожар – сето тоа потсетува на првиот ваков напад врз нашиот главен град, кој се случи во 1941 година.
Утрово сами ја браниме државата како и вчера. Најмоќните сили во светот гледаат од далеку.
Дали вчерашните санкции ја преубедија Русија? Ние слушаме на нашето небо и гледаме на нашата земја дека тоа не е доволно. Туѓи трупи се уште се обидуваат да станат поактивни на нашата територија.
Само солидарноста и решителноста на Украинците може да ја зачува нашата слобода и да ја заштити државата. Армијата, граничарите, Националната гарда, полицијата, разузнавањето, Силите за територијална одбрана – сите максимално ги извршуваат своите задачи.
Многу е важно денес и нашите граѓани да покажат максимална издржливост и меѓусебна поддршка. Грижете се за вашето семејство и најблиските, но не заборавајте за луѓето кои се околу вас. Оние кои се сами, оние кои се постари. Помогнете им со производи.
Помогнете им да најдат засолниште кога има воздушен аларм. Помогнете им со пристап до проверени официјални информации.
Запирајте го непријателот каде и да го видите. Судбината на Украина зависи само од Украинците. Никој освен нас самите нема да ги контролира нашите животи. Ние сме на своја земја, вистината е со нас. Нема да успеат да ни го уништат карактерот. Ракетите „Калибар“ се беспомошни против нашата слобода.
Русија сепак ќе мора да разговара со нас порано или подоцна. Да пазговара за тоа како да се стави крај на воените дејства и да се запре оваа инвазија. Колку побрзо започне разговорот, толку помали ќе бидат загубите на Русија.
Почитувани граѓани на Руската Федерација. Како што веќе реков, вечерва почнаа да се бомбардираат станбените квартови на градот херој Киевв. Сето тоа потсетува на 1941 година. Сакам да им порачам на сите граѓани на Руската Федерација кои протестираат – ве гледаме. Тоа значи дека Вие нѐ слушнавте. Ова значи дека почнувате да ни верувате. Борете се за нас. Борете се против војната.
Почитувани граѓани на Украина.
Се браниме! Не застануваме!
Слава на сите Вас!
Слава на нашата армија!
Слава на Украина!
