Каква сензација! Браво момци, браво! Вие сте вистински херои, оваа вечер покажавте што значи борбеност, желба, истрајност! Неверојатна победа која е резултат на многу труд и работа, но пред се љубов кон националниот дрес, напиша на Фејсбук премиерот Димитар Ковачевски по вечерашната победа на Македонската фудбалска репрезентација.
Премиерот упати честитки и за селекторот Милевски и целиот тим, посочувајќи дека оваа вечер нема никогаш да ја заборавиме.
На чекор до Катар, благодарни сме на радоста што ни ја приредувате, напиша на Фејсбук претседателот Стево Пендаровски по вечерашната победа на Македонската фудбалска репрезентација.
-Нашите фудбалски херои веќе ја испишаа историјата на македонскиот фудбал. Честитки за победата, пожртвуваноста, храброста и борбеноста во играта на нашата македонска фудбалска репрезентација против силниот противник, напиша Пендаровски.
Македонската фудбалска репрезентација вечерва во Палермо ја совлада Италија со 1-0 (0-0) и обезбеди пласман во финалето од баражот за пласман на Мундијалот 2022 против Португалија на 29 март.
J. Ѓ.
