Град Скопје оваа година сеуште не ја објавува листата на поддржани проекти од областа на културата за 2022.
Учесниците на конкурсот се известени за резултатите дел од нив – (особено одбиените веќе имаат свои реакции на социјалните медиуми), но имињата кој добил буџетски пари и за каков проект не се објавуваат јавно.
Досега, со години листата на поддржани проекти се објавуваше јавно и транспарентно на сајтот на Град Скопје, а информација со сите имиња се испраќаше и до медиумите. Дали се соочуваме со “независно” криење на информации од јавен интерес или се уште има време да ги објават резултатите ќе дознаеме во наредниот период.
Од Град Скопје се уште нема одговор на ова прашање кое веќе неколку дена ја тресе јавноста, бидејќи сепак станува збор за буџетски пари. За овој повик во буџетот се предвидени 220.000 евра.
Јавниот повик за поддршка на проекти од областа на културата беше објавен на 7 октомври лани и во огласот стоеше дека трае 30 календарски денови, односно до 5 ноември.
„Резултатите од јавниот повик ќе бидат објавени на официјалниот веб портал на Град Скопје со решение за финансирање на програми и проекти од областа на културатаво интерес на Град Скопје за 2022“
Оттогаш се поминати 5 месеци, а градоначалничката Данела Арсовска и Град Скопје уште не ги објавува имињата.
Минатата недела шокантно беше што од страна на Tiiit! Inc дознавме дека фестивалот “Прво па Женско” еден и единствен од ваков тип е одбиен од страна на Град Скопје без никакво образложение.
На социјалните медиуми деновиве реагираат десетици здруженија, правни и физички лица кои аплицирале, деновиве реагираа дека само формално преку електронска пошта биле известени дека не добиле средства и сите имаат само едно прашање: “Дали ќе излезе листата на прифатените проекти за 2022-ра година?
Зошто Град Скопје и градоначалничката Данела Арсовска ги кријат и сеуште не ги објавуваат прифатените проекти – никој не знае, но едно со сигурност се знае а тоа е дека јавноста очекува Град Скопје во најбрз можен период да го исполни членот 7 од Јавниот повик и транспарентно да и соопшти на јавноста што ќе може да гледа и во какви културни манифестации ќе ужива оваа година.
В.К
