Европската Комисија не ја коментира можната одлука милијардерот Илон Маск да стане единствен сопственик на популарната социјална мрежа Твитер, јави дописничката на МИА од Брисел.
Ова е одговорот на Европската Комисија на новинарско прашање за време на дневниот брифинг во Брисел.
-Комисијата никогаш не коментира бизнис одлуки, посебно кога се во тек, она што е важно е правилата на уредбите на Актот за дигитални услуги и на дигиталниот пазар кои ги уредуваат и социјалните платформи, во заедничкиот пазар тие се истите правила за сите платформи, и не е важно кој колку поседува сѐ додека ги следат правилата, изјави Јоханес Барке, портпарол на Европската Комисија.
Советот и Парламентот на ЕУ викендов постигнаа политички договор за законодавството за дигитални услуги, познато како ДСА. Овие нови уредби воведуваат правила за работата на сите платформи и чинители на интернет и има за цел на корисниците да им донесе поголема контрола и транспарентност, а платформите да се соочат со отчетност, заштита на корисниците и заштита на слободата на изразување.
ДСА истовремено е фокусиран и на регулирање на нелегалните и штетните содржини на интернет, во овие категории спаѓа и дезинформацијата. Платформите ќе имаат обврска да вршат проценка на ризикот.
Поврзано:
Илон Маск наскоро би можел да стане единствен сопственик на Твитер
