Патријархот Порфириј по денешното сослужување на заедничка литургија со арихиепископот охридски и македонски, г.г. Стефан во Соборниот храм во Скопје, рече дека Соборот на Српската православна црква ја благословува и одобрува афтокефалноста на Македонската православна црква – Охридска архиепископија.
Македонскиот државен врв со изразено задоволство од одлуката на Српската православна црква, упати честитки до МПЦ – ОА, поглаварот г.г. Стеван и до граѓаните од православна вероисповед.
Одлуката на СПЦ за прифаќање на афтокефалноста на МПЦ-ОА ќе придонесе за исправање на историските неправди
Претседателот Стево Пендаровски упати честитики по повод донесената одлука од соборот на Српската православна црква за прифаќање на автокефалноста на Македонската православна црква – Охридска архиепископија.
„Упатувам честитки до поглаварот на Македонската православна црква – Охридска архиепископија (МПЦ-ОА) г.г. Стефан и до сите граѓани од православна вероисповед по повод едногласно донесената одлука од соборот на Српската православна црква за прифаќање на автокефалноста на МПЦ-ОА. Ова е радосна вест за сите граѓани на земјава од православна вероисповед, која следи по одлуката на Вселенската Патријаршија за прием на нашата Црква во канонско единство и во евхаристиско општење, се наведува во пораката на претседателот Пендаровски.
Одлуката на Српската православна црква, наведува натаму Пендаровски, ќе придонесе за исправање на историските неправди и отвора можност за нов и необременет духовен раст на Охридската Архиепископија.
Автокефалноста на МПЦ-ОА е историска вест и автентичен дел на македонскиот идентитет
Премиерот Димитар Ковачевски од Рим со честитка за автокефалноста на МПЦ-ОА.
„Голем е денешниот ден, историски, кога ги чествуваме Светите браќа Кирил и Методиј, да ја добиеме и автокефалноста на нашата црква како рамноправна со другите и како признание за нејзиното наследство во духовната величина на древната Охридска Архиепископија, и како автентичен дел на македонскиот идентитет. Се радуваме заедно со сите православни христијани во нашата земја на историската вест со која Македонската православна црква – Охридска Архиепископија се стекнува со автокефалност.
Оваа со векови очекувана вест е соопштена денеска на заедничката служба со Српската православна црква, на која патријархот Порфириј соопшти дека одлуката МПЦ-ОА да биде прифатена како автокефална црква ќе биде предложена пред Вселенската патријаршија со препорака таа да биде прифатена од сите православни цркви. Нека е честит овој голем ден за сите православни верници и за сите граѓани“, истакна премиерот во честитката.
Од денес македонскиот народ нема проблем ниту со името на својата македонска земја, ниту со својата МПЦ-ОА, ниту со својата безбедност и сигурност
„Македонскиот народ и сите граѓани на Северна Македонија, сите заедно одлучивме да живееме во мир, единство, слога и напредок. Одлучивме да решаваме проблеми и да создаваме иднина. Договорот од Преспа, членството во НАТО, Отворен Балкан и политиките на добрососедство се причината зошто од денес македонскиот народ нема проблем ниту со името на својата македонска земја, ниту со својата Македонска православна црква – Охридска архиепископија, ниту со својата безбедност и сигурност. Живееме и ќе живееме во слога со нашите балкански браќа и сестри, целосно ја заокружуваме нашата духовна и државна независност., истакнува во објава на Фејсбук поранешниот премиер Зоран Заев, кој во 2020 година упати писмо до патријархот Вартоломеј и Цариградската патријаршија за обезбедување автокефалност на МПЦ-ОА.
Заев во писмото го потсетува патријархот Вартоломеј на нивната средба во Истанбул на која бело побарана асистенција и заложба на вселенскиот патријарх за Македонската православна црква – Охридска архиепископија да биде признаена како автокефална и да биде примена во заедницата на помесните православни цркви.
Делегација на Синодот на МПЦ-ОА што ја предводеше г.г. Стефан, архиепископ на МПЦ-ОА, придружуван од митрополитите г. Тимотеј и г. Климент, тогаш искажаа благодарност за писмото упатено од Заев до патријархот Вартоломеј и Цариградската патријаршија и ја поздравија оваа инцијатива како важна поддршка од Владата во процесот на обезбедување автокефалност на МПЦ-ОА.
Убава вест за Македонците, за сите православни верници, и за сите граѓани на Северна Македонија. Честитки до МПЦ и до сите верници кои долго време ја чека оваа правична одлука
Шефот на дипломатијата Бујар Османи и министерот за Економија Крешник Бектеши упатија честитики до МПЦ и до сите верници по повод одлуката на СПЦ за прифаќање на афтокефалноста на МПЦ-ОА.
Убава вест за Македонците, за сите православни верници, и за сите граѓани на Северна Македонија
Саборот на Српската православна црква (СПЦ) донесе правилна одлука со која ја прифаќа автокефалноста на Македонската православна црква – Охридска архиепископија (МПЦ-ОА). Честитки МПЦ и до сите верници кои што долго време ја чека оваа правична одлука, наведува Османи на својата Фејсбук страница.
Пендаровски и Вучиќ од Давос ја поздравија одлуката на СПЦ за прифаќање на афтокефалноста на МПЦ-ОА
„Со претседателот на Република Србија, Александар Вучиќ на кратка средба во Давос заеднички ја поздравивме одлуката на СПЦ за прифаќање на автокефалноста на МПЦ – ОА, како чекор во вистинска насока, објави претседателот Пендаровски на својата Фејсбук страница.
Ќе бидат известени сите помесни православни цркви по својот каконски ред и тие да го прифатат афтокефалниот статус на МПЦ-ОА
По објавувањето на радосната вест од страна на патријархот Порфириј, следеше долг и громогласен аплауз од верниците кои се наоѓаат во и околу Соборниот храм „Свети Климент Охридски“. Како што рече патријархот, Светиот собор на СПЦ му дал должност на Синодот, во соработка со архиепископот Стефан и неговиот Синод, да разработат техничко-организациски детали, по што ќе следи свеченото прогласување на официјален акт. Патријархот Порфириј, најави дека после ова ќе бидат известени сите помесни православни цркви по својот каконски ред и тие да го прифатат афтокефалниот статус на МПЦ-ОА.
Ј. Ѓорѓиоски
