Како Сталин го оцрнуваше Тито во 1949?
Во советското „сатирично“ списание „Крокодил“, во период од 1949-1953, можат да се најдат бројни пропагандни прилози кои се обидуваат да го оцрнат Јосип Броз Тито. Покрај формалната осуда од Коминтерната, Тито е и пропагандно осудуван во сатиричните прилози во “Крокодил”, кои ќе ги проследиме во неколку продолженија.
1. Тито како американски убиец, а пиштол му е Ранковиќ
Маршалот Тито е претставен во американска униформа, со американски очила и пура, со крвави раце. Ранковиќ е нацртан како негова десна рака, со мртовечка глава на капата. Во текстот се тврди дека во последната година Тито и Ранковиќ убиле, уапсиле, и измачувале повеќе комунисти отколку буржоаскиот режим за 10 години.
2. Тито како нацист и хитлеровец
Се карикира изјавата на Тито дека оди по социјализмот по свој пат. Според карикатурата, титовиот пат бил пат кон фашизмот, со Хитлеровата книга „Мојата борба“ под мишка, со секира во рака и со нацистички поздрав, и со американски долари во џебот.
3. Тито во фашистичките прегратки на Западот
Тито со крвави раце претставен како рипа во Западното „мочуриште на реакцијата“, каде што го дочекуваат западните сојузници, исто така со крвави раце. Во мочуриштето плива атомска бомба и цветаат нацистички симболи.
4. Тито дехуманизиран како фашистичка змија
Насловната страница на „Крокодил“ од 20 септември 1949 го дехуманизира Тито како фашистичка змија во американски шешир. Шеширот е змијско гнездо од кое излегуваат диверзии, предавства, шпионажа, терор и Тито како најголемата змија на САД.
5. Тито управуван од Американците
„Вујко Сем“ го вози Тито, романска карикатура преобјавена во „Крокодил“.
6. „Бандитот на Волстрит“ Тито спореден со бандитите Адолф и Бенито
Црна пропагандна стихотворба за Тито оцрнет како платеник на Волстрит, во која Ѓилас е оцрнет како Гебелс, а Кардељ како Рибентроп. На „предавникот“ Тито, кој е претставен како платеник, крволок, дезертер и подлец, му се предвидува црн крај како на фашистичките бандити Адолф и Бенито.
7. Тито како американски платеник и крволок
Тито претставен како американски должник, во фашистичка униформа, со крвава секира во рацете, како го исплаќа долгот со крв.
8. Реакционерот Тито како слуга, вазал и марионета на Западот
Карикатура на Тито во служба на реакцијата, поконкретно, на Черчил.
Три карикатури со кои се оцрнува Тито како вазал и послушник на САД.
Неколку преобјавени карикатури во кои се претставува Тито како му коленичи на САД, како сојузник со фашистот Франко, и како послушен крволочен пес зависен од американски долари.
9. Тито како американски пион и платеник
Карикатура во која Тито е претставен како крволочна жаба, која со помош на американските долари е поставена во Советот за безбедност на ООН.
Карикатура на „крволокот“ Тито, со американска кравата и широки “каубојки” претставени како чанта за прибирање долари.
Стихотворба за марионетите во која е претставен и Тито.
10. Тито како врзано куче на корумпираниот Запад
Тито претставен како врзано куче на Атлантскиот пакт, со крвави шепи и чинија крв.
Секоја сличност во обидите за “нацистичко” оцрнување на Тито од страна на Сталин, со обидите за “нацистичко” оцрнување на Зеленски од страна на Путин, не е случајна. Станува збор за истата пропагандна оцрнувачка школа.
Подготви: Дежурната екипа на Фронтлајн
