Украинци! Украинки! Наши бранители и наши бранителки! 22 јуни, е Ден на жалост и сеќавање на воените жртви. Таа војна. Војната која требаше засекогаш да остане во историјата на дваесеттиот век и никогаш да не се повтори. Но, се повторува. Денес нема дефицит на зборови за тоа дека Русија на 24 февруари го направи истото што го направија нацистите на 22 јуни. Многу е кажано за ова. И сакам да додадам само едно. Тогаш од утрото на инвазијата до поразот на агресорот поминале 1418 дена. Ние мора да ја ослободиме нашата земја и да дојдеме до победа, но порано. Многу побрзо. Ова е наша национална цел и мора да работиме на нејзино остварување секојдневно. Не само државата, туку секој граѓанин, секоја граѓанка – на ниво на кое тоа е можно, рече во најновото обраќање до нацијата, украинскиот претседател Володимир Зеленски.
„Уште од утрото го продолжив телефонскиот маратон за позитивна одлука за кандидатство за Украина. Денес – 11 лидери.
Бугарија. Му се заблагодарив на Премиерот на Бугарија Петков за поддршката на Украина и развојот на цела Европа со нашето учество.
Латвија. Со господинот Премиер Карински разговаравме за соработката меѓу нашите земји, меѓу Украина и Европската унија, како и нашите заеднички можности за да ја заштитиме Европа од кризите кои ги предизвикува Русија, вклучително и кризата со храна.
Грција. Мило ми беше што ги слушнав зборовите за искрена поддршка за Украина, со Премиерот ја имаме истата визија за историското значење на одлуката што се очекува од Европскиот совет.
Шведска. Со Премиерот Андерсон разговаравме за перспективите за билатерална соработка и соработка на ниво на европски структури.
Естонија. Ѝ се заблагодарив на Премиерката Калас за континуираната поддршка за Украина. Разговаравме за приоритетите на нашата соработка и агендата во контекст на самитот на НАТО во Мадрид следната недела.
Чешка република. Плоден разговор со господинот Премиер Фиала. Се разговараше за приоритетите на претседавањето на Чешката Република со Советот на Европската Унија во следните шест месеци. И сега сум убеден дека гласот на Чешка е за Украина.
Белгија. Му се заблагодарив на Премиерот Де Кро за поддршката на нашата европска перспектива и го поканив да ја посети Украина. Се надевам дека Белгија ќе земе значајно учество во повоената обнова на нашата земја.
Австрија. Благодарен сум му на Канцеларот Негамер за политичката и хуманитарната поддршка, за разбирањето на потребите на Украина. Можеме да направиме многу за да ги развиеме односите меѓу нашите држави.
Словенија. Се договоривме со господинот Премиер Голоб дека можеме да ја зајакнеме соработката меѓу нашите земји. Му се заблагодарив за доследната поддршка на кандидатурата за Украина.
Молдавија. Разговарав со Претседателката Санду. Меѓусебно се поддржавме во пресрет на важниот состанок на Европскиот совет. И ние ќе си помагаме за побрзо да го поминеме овој пат до Европската Унија.
Денес повторно разговарав со Претседателот на Литванија, Гитанас Наузеда. Му изразив целосна поддршка за ситуацијата околу Калининградската област на Русија.
Утре ќе го продолжам овој маратон – мора да дадеме максимална поддршка на нашата држава. Очекуваме клучна европска одлука утре вечер.
Окупаторите извршија напад врз Миколајив, седум ракети. За среќа нема загинати, а петмина се повредени. Удари имаше и во Харкивската област. Има жртви. Тие пукаа на границите на Чернигивската и Сумската област.
Во Донбас – масивни воздушни и артилериски напади. Целта на окупаторите во оваа насока останува иста – тие сакаат чекор по чекор да го уништат целиот Донбас. Целиот. Лисичанск, Славјанск, Краматорск – тие треба да го направат секој град како Мариупол. Целосно руиниран.
Затоа постојано го нагласуваме забрзувањето на испораката на оружје за Украина. Паритет е потребен на бојното поле што е можно поскоро за да се запре оваа ѓаволска армада и да се пресели надвор од границите на Украина.
Благодарен сум им на Соединетите Држави за нивната помош во истрагата за воените злосторства на територијата на Украина. Благодарен сум му на г-дин Ели Розенбаум за неговата подготвеност да се приклучи во воспоставувањето на правдата – тој е еден од оние американски истражители кои успеаја да разоткријат многу нацисти. Нашиот заеднички истражен тим мора да биде што е можно посилен за никој од руските криминалци да не ја избегне казната. И ова ќе биде еден од најголемите придонеси за заштита на меѓународното право и поредок денес. Исто како што 1 септември 1939 година и 22 јуни 1941 година завршија со Нирнбершкиот трибунал, мора да заврши во праведен трибунал и 24 февруари 2022 година. Русија мора да одговара за сето зло што ѝ го донесе на Украина.
Денес потпишав нов указ за доделување награди на нашите херои. На 195 учесници во воените дејствија им беа доделени државни награди, од кои 17 постхумно.
Вечен спомен на сите чии животи ги одзедоа окупаторите!
Вечна слава на секој и на секоја што се борат за Украина!
Се подготвуваме за историската одлука на Европскиот совет, остануваат уште само неколку часа до неа.
Слава на Украина!“, рече Зеленски.
