Премиерот Димитар Ковачевски вчера на Генералната дебата на 77-то Генерално собрание на ОН во Њујорк нагласи дека „граѓаните на Северна Македонија заслужуваат најголема заслуга, бидејќи предолго го чекаа овој момент. Членството на Република Северна Македонија во ЕУ е од суштинско значење и за Европска Унија“, соопшти прес-службата на Владата.
Ние немаме друга алтернатива која ќе ни овозможи подобар животен стандард, а и никој не рече дека сето ова ќе биде лесно. Напротив, и покрај сите потешкотии, ЕУ е сѐ уште најдобрата опција за нашата иднина, за иднината на нашите деца. Ние, едноставно ја немаме ниту можноста, ниту привилегијата да се откажеме сега. Сега е вистинското време да продолжиме со полна пареа, уште побрзо напред, изјави претседателот на Владата на Северна Македонија.
Премиерот Ковачевски истакна дека и покрај сите потешкотии, Европската Унија е сѐ уште најдобрата опција.
Сакам да потенцирам дека членството на Република Северна Македонија во ЕУ е од суштинско значење и за самата Европска Унија, посебно во новите околности на глобален план, кога овој знак на охрабрување – дека процесот на проширување е актуелен го очекува целиот регион, којшто колку и да има прогресивни раководства не е имун на глобалните предизвици. А и, во услови кога треба и мора да се осигура евроинтеграцискиот, демократски пат на државите од Западен Балкан, како придонес во европскиот мир, додаде Ковачевски.
Претседателот на Владата на Генералната дебата во ОН потенцираше дека Северна Македонија работи на решенија и со заедништво ги решава предизвиците кои не познаваат државни граници, етнички, јазични, религиски или други разлики.
