„Отворен Балкан не треба никого да плаши, напротив, тоа е оригинална идеја, не само на политичарите, туку и на бизнис заедницата и на граѓаните на Северна Македонија, Албанија и Србија“ изјави премиерот Димитар Ковачевски на прес-конференцијата со неговиот албански колега Еди Рама.
Тој додаде дека кога ќе се погледне на запад од Балканот, таму веќе нема граници, а единствени граници кои се останати се на Балканот.
„На нас тие граници не ни требаат. Ние денес докажавме со Еди Рама, докажуваме и со Вучиќ и со Бугарија и со Мицотакис, дека тие граници не ни требаат“ рече Ковачевски.
Рама се надоврза дека иницијативата „Отворен Балкан“ е само забрзување на Берлинскиот процес и е идеја која ќе остане.
„Берлинскиот процес е една локомотива која што ги влече сите лидери од регионот на едно ново патување. Со Отворен Балкан, Берлинскиот процес само се зацврстува, мислам дека Берлинскиот процес е отворен ама не доживотен, додека Отворен Балкан е навистина доживотен“ рече Рама.
