Владата на Албанија донесе декрет со кој 6 декември, денот кога ќе се одржи самитот меѓу Европската унија (ЕУ) и Западен Балкан во Тирана, ќе биде неработен ден поради потребата да се наметнат строги безбедносни мерки, на кои опозицијата ќе им пркоси со организирање на антивладин протест.
Јавната администрација и сите училишта во главниот град Тирана ќе бидат затворени, додека сообраќајот на возила ќе биде забранет во центарот на Тирана, каде што се очекува распоредување на околу 1.500 полициски службеници да ја гарантираат безбедноста на европските лидери.
Полицијата не и даде дозвола на фракцијата на опозициската Демократска партија (ПД), предводена од поранешниот премиер Сали Бериша, да одржи протест во 12:00 часот по локално време пред седиштето на Владата бидејќи смета дека демонстрациите „ја поткопуваат националната и јавната безбедност“.
Градскиот совет на Тирана предложи протестот да го одржат на друго место, односно на централниот плоштад „Скендербег“, што беше отфрлено од историскиот лидер на ПД, Сали Бериша.
Бериша, прогласен за персона „нон грата“ од САД за корупција и поткопување на демократијата, како и од Велика Британија, рече дека „ништо нема да го спречи“ и вети дека „ќе го наполни булеварот како никогаш досега“ со своите поддржувачи кои ќе побараат оставка на премиерот Еди Рама, кого го обвинува дека земјата ја претворил во нарко-држава.
Самитот доаѓа во време кога Албанија и Северна Македонија веќе ги започнаа преговорите за пристапување во ЕУ, додека Босна и Херцеговина го чека статусот на земја-кандидат.
