Банката на Силиконската долина пропадна во петокот наутро по американско време по неверојатни 48 часа, во кои банкротот и капиталната криза доведоа до вториот најголем неуспех на финансиските институции во историјата на САД, објави Си Ен Ен.
Калифорниските регулатори го затворија технолошкиот заемодавач и го ставија под контрола на американската Федерална корпорација за осигурување на депозити. FDIC делува како стечаен управител, што обично значи дека ќе го ликвидира имотот на банката за да ги исплати своите клиенти, вклучувајќи ги штедачите и доверителите.
FDIC, независната владина агенција која ги осигурува банкарските депозити и ги надгледува финансиските институции, соопшти дека сите осигурени штедачи ќе имаат целосен пристап до нивните осигурени депозити најдоцна до понеделник наутро. Наведено е дека на неосигураните штедачи ќе им биде исплатена „авансна дивиденда во текот на следната недела“.
Работите се влошија во средата, кога Банката објави дека продала куп хартии од вредност со загуба и дека ќе продаде 2,25 милијарди долари нови акции за да го зајакне својот биланс. Ова предизвика паника меѓу клучните фирми за ризичен капитал, кои наводно ги советувале компаниите да ги повлечат своите пари од банката.
Акциите на компанијата паднаа во четвртокот, повлекувајќи ги и другите банки. До петокот наутро, акциите на Банката на Силиконската долина беа стопирани и се откажаа од напорите брзо да соберат капитал или да најдат купувач. Акциите на неколку други банки беа привремено стопирани во петокот, вклучувајќи ги First Republic, PacWest Bancorp и Signature Bank.
Падот на Банката на Силиконската долина делумно произлегува од агресивното зголемување на каматните стапки на Федералните резерви во изминатата година.
Кога каматните стапки беа блиску до нула, банките се оптоваруваа со долгорочни, навидум нискоризични државни обврзници. Но, додека ФЕД ги зголемува каматните стапки за да се бори против инфлацијата, вредноста на тие средства се намали, оставајќи ги банките со нереализирани загуби, пишува Си Ен Ен.
Г.Т.
