Во Чифте амам, на 31 мај во 20 часот, ќе биде отворена изложба со 45-годишниот ретроспективен опус на реномираниот македонски уметник Владимир Темков, насловена „Убавините на Кавадарци“.
„Со текот на годините, тој ги фиксира своите визуелни потраги. Создава сопствена тематска матрица со заеднички обележја и компонирање на елементите во линеарни и хроматски решенија, со кои достигнува занимливо рамниште на експресивност. Иако работи на повеќе тематски и концепциски циклуси, евидентно е проткајувањето на веќе утврдениот ликовен модус во сите циклуси и негово постојано испреплетување. Со идејата дека бојата ја претставува апотеозата на светлината, нашиот сликар ја гради, од слика во слика, од циклус во циклус, својата сликарска поетика во која примарна материја е бојата, како и енергијата што ја пренесува таа“, се наведува, меѓу другото, во најавата за изложбата.
На изложбата ќе зборуваат директорката на националната галерија Дита Старова, градоначалникот на општина Кавадарци Митко јанчев, претседателката на ДЛУМ Јана Манева-Чупоска и други познати личности од јавниот живот во земјава.
Темков е претседател на Друштвото на ликовни уметници на Кавадарци, како и потпретседател на Друштвото на ликовни уметници на Македонија. Добитник е на многу домашни и меѓународни признанија од областа на ликовната уметност. Има учествувано на голем број ликовни колонии, симпозиуми и семинари.
Г. Т.
