Иницијативата Отворен Балкан е оригинална идеја на Србија, Албанија и Северна Македонија и резултатите од неа, се во факти, потенцира премиерот Димитар Ковачевски на сесијата ‘Вистинската регионална соработка го одржува бродот стабилен’ во рамки на Преспа форум дијалогот.
-Извозот на Северна Македонија кон Србија изминатата година се зголеми за 50 проценти, а кон Албанија за 40 проценти. И нивниот извоз кон нашата земја исто така се зголеми. Со зелените ленти на граничните премини, транспортните камиони на Ќафасан и Табановце се движат со минимално време на чекање, со што сега транспортот на продукти, односно и увозот е повеќекратно забрзан. Исто така, ако во минатото, за да можат граѓаните да работат во некоја од земјите на Отворен Балкан беше потребно да се најде работодавач, за да се аплицира за дозвола за престој врз основ на добиена работа и тие процедури на чекање траејa повеќе месеци, сега правото на пристап до пазарите на труд во трите држави е значително поедноставено, информира Ковачевски.
Премиерот вели дека бројот на туристи, на пример, од Србија – во нашата држава, во 2022 година, во однос на 2021 година е зголемен за дури 500 проценти.
-Економските пазари на нашите држави поединечно, се мали пазари, поради што ја унапредуваме иницијативата за заеднички регионален пазар. Со тоа обезбедуваме поголема конкурентост на европскиот пазар и стануваме попривлечни за странските инвеститори дома. Пошироко во регионални рамки, со Грција и со Албанија, веќе градиме стабилни врски за транспорт на енергија. Започнати се процедурите за изградба на нов гасовод меѓу Северна Македонија и Грција што ќе биде поврзан со терминалот во Александропули, а е предвидено да има и други два, во Волос и во Пиреја. Исто така, во Албанија има дискусии за терминал на едно од нивните пристаништа, веројатно Драч или Валона, кажа премиерот.
Тој потсети дека се спроведува и јасен план за изградба на патната инфраструктура – и кон истокот и кон западот. Коридор 8, веќе стана дел од европските коридори, заедно со Коридорот 10.
-Градиме нов автопат кон границата со Албанија. Градиме и експресен пат кон Бугарија како и железница кон Бугарија.
Коридорот 8 е навистина значаен за Република Северна Македонија, затоа што покрај пристапот до пристаништето во Солун, добиваме пристап и до пристаништата во Драч, Албанија и Бургас, Бугарија. Ние сме центарот на Балканот и со вложувањата во инфраструктурата, од обиколница, државата ја поставуваме во вистински транспортен крстопат и коридор на целиот Балкан, што ќе биде огромен инпут во развојот на економијата и стандардот на граѓаните, заклучи премиерот.
