Премиерот Ковачевски на дебатата ја реафирмира улогата на Сојузна Република Германија како докажан партнер на евроинтегративниот пат на Северна Македонија. Таквиот однос се темели на три децении развиени билатерални односи, како и германскиот континуирано објективен пристап и придонес кон напредокот на нашата земја.
Континуираниот развој на пријателските односи се рефлектира и во економската соработка и трговската размена меѓу двете земји, која само минатата година изнесуваше 3,2 милијарди евра. Соработката се темели и на важни стратешки инвестиции, како и на големи производствени капацитети кои германските компании ги отвораат во Северна Македонија.
Воедно, се разговараше и за поддршката на Европската Унија, конкретно финансиската поддршка која преку ИПА фондовите досега е над една милијарда евра, што ја потврдува позицијата на ЕУ како најголем донатор во земјата. Во наредниот период, преку ИПА 3 инструментот Северна Македонија ќе има на располагање 180 милиони евра, до 2027 година, но и 97 милиони евра неповратни средства за земјоделството преку ИПАРД 3.
Осврнувајќи се на проширувањето на Европската Унија со земјите од регионот на Западен Балкан, премиерот Ковачевски истакна дека проширувањето на ЕУ со земјите од Западен Балкан не е само прашање на проширување туку и геостратешко позиционирање во регионот, а во контекст на воената агресија на Русија во Украина.
Премиерот Ковачевски ја поздрави улогата на фондацијата „Фридрих Еберт” во нашата земја и нејзината активна поддршка на реформите и демократската изградба на земјата во изминатите 27 години.
