Северна Кореја денеска истрела ракета со долг дострел од нејзиниот источен брег, што претставува дванаесетто лансирање на Пјонгјанг годинава, пред состанокот меѓу јужнокорејските и јапонските лидери во Вилнус.
Лансирањето уследи по реакциите на Северна Кореја во последните денови, вклучително и обвинувањата дека американските шпионски авиони неодамна го нарушиле нејзиниот воздушен простор, како и осудите за неодамнешната посета на Јужна Кореја на американска подморница со крстосувачки ракети со нуклеарен погон.
Лансирањето се случува за време на самитот на НАТО во Литванија каде лидерите на Јужна Кореја и Јапонија ќе разговараат за растечките закани, вклучително и нуклеарно вооружената Северна Кореја.
Јапонската крајбрежна стража соопшти дека она за што се верува дека е балистичка ракета паднала во морето утрово по локално време, надвор од јапонската ексклузивна економска зона, на околу 550 километри источно од Корејскиот полуостров.
Проектилот летал 74 минути до височина од шест илјади километри, а дострелот му бил околу илјада километри, јави јапонската телевизија Асахи, повикувајќи се на јапонски претставник од одбраната, што би било најдолгото време на лет на севернокорејска ракета досега.
