Родители на средношколци со атипичен развој реагираат дека и оваа година државата не обезбедила образовни асистенти за овие ученици.
„Започна уште една школска година во која државата не обезбеди образовни асистенти за средношколците со атипичен развој! Законот за средно образование заглавен во лавиринтите на неспособност, незаинтересираност, бахатост стои во некоја фиока да собира прашина“, реагира во објава на Фејсбук, Доминика Кардула.
Таа истакнува дека „дискриминацијата пак вирее на отворено, затворено и во сите сегменти од животот на лицата со атипичен развој!“.
На никого не им е гајле дали средношколците со атипичен развој ќе можат да посетуват школо, додава Зоран Кардула.
Во Јули оваа година министерот за образование и наука Јетон Шаќири најави дека „повеќе од 800 образовни асистенти ќе бидат ангажирани во основните училишта во новата учебна година, за да им помагаат на учениците со посебни образовни потреби полесно да ја совладуваат наставната материја и училишните обврски.
Шаќири тогаш информираше дека „во постапка на изработка е нов Закон за средно образование и дека во истиот се предвидува ангажирање на образовни асистенти и во средните училишта, кои досега се вклучуваа преку програма за општинско корисна работа, склучена помеѓу општините, Град Скопје, МОН, МТСП и УНДП како финансиер“.
Ј. Ѓ.
