Министерот за надворешни работи на Израел, Ели Коен, денеска изјави дека нема да се сретне со генералниот секретар на Обединетите нации, Антонио Гутереш, откако шефот на ОН го критикуваше израелското бомбардирање на Газа.
„Нема да се сретнам со генералниот секретар на ОН. По масакрот на 7 октомври, нема простор за балансиран пристап. Хамас мора да се избрише од лицето на планетата!, објави денеска Коен на социјалните мрежи.
I will not meet with the UN Secretary-General. After the October 7th massacre, there is no place for a balanced approach. Hamas must be erased off the face of the planet!
— אלי כהן | Eli Cohen (@elicoh1) October 24, 2023
Во обраќањето пред Советот за безбедност на ОН во Њујорк, Гутереш денеска истакна дека е „длабоко загрижен поради јасното прекршување на меѓународното хуманитарно право на кои сме сведоци во Газа“. „Заштита на цивилите не значи да се нареди повеќе од милион луѓе да се евакуираат на југ, каде што нема засолниште, храна, вода, лекови или гориво – и потоа да се продолжи со бомбардирање на самиот југ“, рече Гутереш.
„Да бидам јасен: ниту една страна во вооружениот конфликт не е над меѓународното хуманитарно право“, додаде тој. Гутереш во истиот говор нагласи дека „поплаките на палестинскиот народ не можат да ги оправдаат ужасните напади на Хамас, а овие ужасни напади не можат да го оправдаат колективното казнување на палестинскиот народ“.
Коен, кој исто така беше присутен во салата, му одговори на Гутереш: „Во кој свет живеете? Тоа дефинитивно не е наш свет“.
Амбасадорот на Израел во Обединетите нации, Гилад Ердан, го повика Гутереш „веднаш да поднесе оставка“ по неговите изјави. Пишувајќи на социјалните мрежи, Ердан истана дека Гутереш „не е способен да ја води ООН“.
Г. Т.
