Генералниот секретар Јенс Столтенберг денеска во своето обраќање на 75-тата седница на Нордискиот совет во Осло, рече дека длабоката соработка меѓу нордиските земји по долгогодишно непријателство покажува дека „мирот е секогаш можен“. Тој подвлече дека градењето пријателство и доверба меѓу носителите на одлуки е особено важно „во време кога поларизацијата, фрагментацијата и сомнежот ја загрозуваат довербата во демократијата и отворените општества што сакаме да ги изградиме“. Тој посочи дека наскоро целиот нордиски регион ќе биде во НАТО, пренесува НАТО.
Генералниот секретар на НАТО ги осуди терористичките напади на Хамас врз Израел и ја нагласи важноста на одговорот на Израел во рамките на меѓународното право. Тој истакна дека војната не смее да ескалира во голем регионален конфликт. „Не смееме да престанеме да работиме на изнаоѓање на трајно, политичко мировно решение“, рече тој, потенцирајќи дека војната во Газа „не смее да ја ослабне нашата волја и способност да ја поддржиме Украина“.
Предупредувајќи дека нема знаци дека Русија планира мир, Столтенберг истакна дека сојузниците мора да продолжат да и даваат помош на Украина.
„Ако Украина престане да се брани, тие ќе бидат окупирани, а окупацијата не е мир“. Нарекувајќи ја руската инвазија „стратешки пораз“ кој ја направи Москва уште поизолирана, тој подвлече дека „инвестирањето во безбедноста на Украина значи инвестиција во нашата безбедност“, бидејќи победата на Путин ќе им покаже на авторитарните лидери дека воената сила е исплатлива.
Столтенберг своето обраќање го заокружи со заклучокот дека НАТО не само што се зајакнува туку и станува поголемо. По пристапувањето на Финска во април, Шведска исто така наскоро ќе се приклучи на Алијансата. Ова „ја зајакнува нашата способност да го браниме нордискиот регион; ја зајакнува нашата способност да бидеме присутни во северните региони; и ја зајакнува нашата способност да им помогнеме на нашите балтички соседи“, рече тој.
Подготви: Марта Пешевска
Извор: ЦИВИЛ Медиа
