Пишува: НЕНАД ЈОВАНОВИЌ
Да ве потсетам колку многу ме исмеваа пред години кога реков дека Албанците се сериозен народ, единствениот народ кој знае што сака, а тоа е Европа. За разлика од, како што се нарекуваат самите ботови на Мицкоски, „етнички Македонци“ кои појма немаат кој пат да го фатат.
Пред да ја развиеме погорната теза, сакам да кажам дека јазикот на национализмот е јазик на омраза; тој, јазикот, не може без непријател, без конфликт, без војна. Обидете се да најдете некој пример во нивната „верност кон нацијата“ а да не се зборува за загрозеност, да не се зборува за нејзините непријатели. Ако го најдете таквиот пример, имено, ве частам десетка со кромид. Би ве частел и книга – со враќање (книги дадени на читање се враќаат или книги се купуваат, книги не се поклонуваат!) – да речеме книгата „Уна и Селинџер“ на Фредерик Бегбеде, ама, пак, кој денес чита книги?
Потајно, „етничките Македонци“ очекуваа, ние од граѓанскиот дел на Македонија (тоа ви е оној дел на Македонија што има „јазик како чорапа“) да ја осудиме коалицијата СДСМ и ДУИ. Не само што нема да ја осудам, туку ја поддржувам. Албанците се сериозен народ, способни се да направат вистинска политичка елита која знае што сака. И каде сака да оди. Оттука, за разлика од „етничките Македонци“ на Мицкоски, Албанците имаат за кого да гласаат.
Додека „етничките Македонци“ на Мицкоски се обидуваа да ја претстават СДСМ и ДУИ како одвратна коалиција, притоа уживајќи во таквата гадост, ВМРО-ДПМНЕ се спрема да направи харикири на следните избори.
На крајот, сè се сведе на тоа, дали Алабнците сакаат коалиција со Мицкоски, ако овој, нели, добие 61 „чист пратеник“. Таквата математика е еднаква на нула – Албанците влегуваат во коалиција со СДСМ на Ковачевски. Отворено, јасно и недвосмислено ни велат – „ние не сакаме влада со Мицкоски и ВМРО-ДПМНЕ“. Уште и премолчено им велат: ние не сакаме влада со криминална група која има за цел да ја затвори земјата и ги блокира Европските интеграции. Им велат, цело време им велат, ако овие вистински умеат да читаат. Им рекоа, отворено, јасно и недвосмислено: поддржете ги Уставните измени, ние ќе одиме во опозиција. Ниту тоа успеаја да го прочитаат. Мицковци никого не слушаат, ништо не читаат, и затоа не знаат кој пат да го фатат. Конфузни, дезориентирани, избезумени, секогаш спремни само за едно: омраза и насилство.
Имено, Албанските лидери денес одлучија, што би се рекло, со кого може да го движат бродот кон Европа. Паметни се, гледаат со кого може да го развиваат мултикултурниот дијалог на земјата, паметни се, сфаќаат дека карактерот на Македонија е мултиконфесионален, интеркултурален. Сфаќаат дека кога Македонија е широка и отворена, има простор и за нив, како што има простор и за нивните интереси. Ако „етничките Македонци“ се залагаа како што Албанците се залагаат денес за Европа, ние немаше да бидеме во овој ќумез. Без Албанците, не може Македонија да оди во Европа. И ова никој не би требало да го заборави.
Меѓутоа, тие сакаат Македонија да ја претстават како човек што до глава е преполн со говна. И додека тоне во говна, уште сакаат да ни кажат дека говната стигнаа до устата. Таквиот човек е загледан во sвездите, притоа ја распламтува својата фантазија и своите соништа. Фасциниран со sвездите од знамето на Европа, сонува за Русија. Каков луд апсурд на „етничките Македонци“.
Да привршуваме, ќе бидам краток и јасен.
Добро е што Талат Џафери ќе биде премиер во техничката владата која треба да организира избори во земјава. Добро е што СДСМ и ДУИ влегуваат заедно. А зошто е добро? Добро е затоа што во конфликтот на национализмот нема победник. Национализмот е како ебола: во конечноста, сосема е неважно кој прв почна затоа што работите непрекинато се шират во омраза и насилство. Заразените со национализам и сами ќе се заразат. Во конечноста, како со национализмот така и со еболата, исходот е смртоносен.
Ако постои Македонски национализам, се поставува прашањето дали постои Албански национализам. Се разбира дека постои. Само што денес Албанците во земјава не прават нешто кое создава закана за дома и за соседите. Никој територијално не е загрозен од Албанците. „Етничките Македонци“ на Мицкоски направиј сè само за да се одделат од Албанците, да маркираат територија, така што се обидуваат да покажат дека Албанците нив не им се потребни.
Како што никогаш не сум го поддржувал концептот „Голема Албанија“, така никогаш нема да го поддржам концептот на Мицкоски „Сите Македонци во една држава“.
Паранојата е еден од тајните имиња на сите национализми. А на самиот крај, сакам да им кажам дека сега доаѓа делот во кој нема да им се допадне на националистите. Уште од Фројд, од неговите анализи за случајот Шребер, знаеме дека постои блиска врска помеѓу паранојата и потиснатата пасивна хомосексуалност.
Мислете малку околу тоа, драги националисти. Или уште подобро, читајте за тоа.
