Владата ја усвои Интервентната програма за поддршка во земјоделството за 2024 година. Една од мерките е финансиска поддршка за сончоглед предаден во регистрирани капацитети за откуп директно или преку еден откупувач, каде земјоделските стопанства ќе се поддржат со 5 денари по предаден сончоглед кај регистрирани откупувачи.
Здружението на земјоделци производители на сончоглед заедно со директорот на „Кристал 1923“, Горанчо Лазов, по завршувањето на сезоната, заеднички побараа од Владата поддршка за новата реколта која поради неповолните временски прилики беше многу намалена.
-Ланската година временските услови не ни одеа во прилог и затоа родот беше намален. Како здружение на производители на сончоглед, побаравме од Владата да ни помогне со директна поддршка и гледаме дека нашето барање е прифатено. Со мерката на Владата и добра откупна цена, ќе се зголеми производството на сончоглед – Изјави земјоделскиот производител – Миле Кебакоски.
Голема поддршка земјоделците имаат и од нашиот најголем откупувач, фабриката за масло – „Кристал 1923“ .
-Ние како фабрика секогаш сме на страната на земјоделските производители, нашите кооперанти и затоа ја поздравуваме оваа поддршка од страна на Владата. Очекуваме да продолжи стратегијата на државата за враќање на сончогледот на македонските ниви, зголемување на домашното производство кое реално може да достигне 10 -15 000 тони. Тоа е добро за целото стопанство и граѓаните бидејќи ќе имаме сигурна суровина и да се намали зависноста од увоз – изјави директорот на „Кристал 1923“ – Горанчо Лазов, и додаде дека уште една важна мерка треба да се донесе за поголема стабилност на ова производство за нив како откупувачи и преработувачи.
– ДДВ за сончоглед од 10 отсто повторно треба да биде како досега на 5 проценти. Сончогледот не е луксузен производ туку суровина за производство на сурово масло, кое е од стратешки интерес за земјава. Затоа воведувањето на 10 отсто ДДВ на сончогледот е директен удар за фабриката и земјоделците бидејќи ниту сончогледот е луксуз ниту има потреба да се воведе 10 отсто ДДВ на сончоглед, затоа што ДДВ на суровото масло е 5 проценти. Нема никаква логика ДДВ на суровината да биде 10 отсто, кога на суровото масло кое го добиваме ДДВ е 5 отсто, потенцира Лазов.
Враќањето на сончогледот на македонските ниви, таа успешна приказна на Договорно производство која започна во 2018 година, мора да продолжи. На овој начин откупувачот има сигурна суровина, а земјоделските производители обезбеден пласман. Владата се погрижи да имаат повисоки субвенции за сончоглед, а земјоделците добиваат и дополнителна поддршка како ѓубриво, зелена нафта, а сега и директна субвенција од 5 денари. Сугестиите од страна на сите чинители во овој значаен процес кога се сфаќаат сериозно резултатот е успешна стратегија за развој.
Извор: Бриф.мк
